Yaxın Şərqdə davam edən hərbi münaqişə fonunda Hörmüz boğazında dəniz təhlükəsizliyi səviyyəsi hələ də kritik olaraq qalır. Bu barədə Böyük Britaniyanın Dəniz Ticarət Əməliyyatları İdarəsi (UKMTO) sosial şəbəkə X-də Birləşmiş Dəniz Məlumat Mərkəzinə (JMIC) istinadən məlumat yayıb.
UKMTO bildirib ki, dənizçilərə radioəlaqə vasitəsilə Oman hakimiyyət orqanları ilə fəaliyyətlərini koordinasiya etmələri və ABŞ-ın yüksək təhlükəsizlik zonası yaratdığı hərəkət bölgüsünün cənubundan, Oman ərazi sularından keçən marşrutu nəzərdən keçirmələri tövsiyə olunur.
Mayın 3-də ABŞ prezidenti İranla müharibə fonunda bloklanan Hörmüz boğazından gəmilərin çıxarılmasına yönəlmiş “Azadlıq Layihəsi” əməliyyatının başlandığını elan edib. Təşəbbüs eskalasiya zonasına düşən üçüncü ölkə gəmilərinin təhlükəsiz keçidini təmin etməyi hədəfləyir. Vaşinqton əməliyyatın humanitar xarakter daşıdığını vurğulasa da, onun həyata keçirilməsinə maneə törədiləcəyi halda güc tətbiqini istisna etmir.
İranda isə xəbərdarlıq edilib ki, ABŞ-ın Hörmüz boğazında gəmiçiliyə hər hansı müdaxiləsi Tehran tərəfindən atəşkəs rejiminin pozulması kimi qiymətləndiriləcək.
