Uşaqlarla ünsiyyətdə yaranan ən böyük problemlərdən biri onların valideynlərinin sözünə məhəl qoymamasıdır. Mütəxəssislər bildirir ki, uşaqların bizi eşitməməsinə və ya deyilənlərə məhəl qoymamasına əslində biz öz davranışlarımızla şərait yaradırıq.
Pravda.az uşaqların sizi həqiqətən eşitməsini təmin edəcək üsulu təqdim edir:
Onların səviyyəsinə enin: Uşağınıza uzaqdan qışqırmaq əvəzinə, yanına gedin, diz çökərək onunla eyni boy səviyyəsinə gəlin və göz təması qurun. Bu, uşağın diqqətini tam olaraq sizə cəmləməsini təmin edir.
"Yox" sözündən az istifadə edin: Daim qadağalar qoymaq uşaqda müdafiə reaksiyası yaradır. Mənfi cümlələr yerinə müsbət alternativlər təklif edin. Məsələn, "Evdə qaçma" yerinə "Evdə yavaş yeriməliyik" deyin.
Qısa və aydın olun: Uzun nəsihətlər uşağın diqqətini dağıdır. İstəyinizi bir neçə sözlə, qısa və konkret ifadə edin. Unutmayın: az söz, daha çox təsir deməkdir.
Onun hisslərini anladığınızı göstərin: Uşaq bir işi görmək istəmirsə, dərhal hirslənməyin. "İndi oyuncağınla oynamaq istədiyini bilirəm, amma yemək vaxtıdır" kimi cümlələrlə onun hisslərini bölüşdüyünüzü hiss etdirin.
Qışqırmayın: Qışqırmaq uşağı qorxudur və onda "blok" yaradır, nəticədə o, deyilənləri başa düşmür. Sakit və qətiyyətli tonla danışmaq daha effektivdir.
Seçim sansı verin: Əmr vermək əvəzinə ona seçim imkanı yaradın. Məsələn, "Paltarını geyin!" demək əvəzinə "Göy köynəyini geyinmək istəyirsən, yoxsa qırmızını?" deyə soruşun. Bu, uşağa özünü idarəetmə hissi verir.
Qeyd: Övladınızla ünsiyyəti əmr üzərində deyil, qarşılıqlı hörmət və anlayış üzərində qursanız, onun sizi daha diqqətlə dinlədiyinin şahidi olacaqsınız.
Əminə Bayramova
