ABŞ Prezidenti Donald Tramp Avropa Komissiyasının sədri Ursula fon der Leyen ilə telefon danışığı apardığını və söhbət zamanı təhlükəsizlik və ticarət məsələlərinin müzakirə olunduğunu bildirib.
Xalqcebhesi.az xəbər verir ki, Tramp bu barədə özünə məxsus "Truth Social" sosial şəbəkəsində yazıb.
“Avropa Komissiyasının sədri Ursula fon der Leyen ilə mükəmməl telefon danışığım oldu. Bir çox mövzunu, o cümlədən İranın heç vaxt nüvə silahına sahib olmamalı olduğu barədə tam həmrəyliyimizi müzakirə etdik. Razılaşdıq ki, öz xalqını öldürən rejim, milyonlarla insanı məhv edə biləcək bombaya nəzarət edə bilməz.
Mən səbirlə Aİ-nin Şotlandiyanın Ternberri şəhərində razılaşdırdığımız Tarixi Ticarət Sazişi — tarixin ən böyük ticarət sövdələşməsi üzrə öhdəliklərini yerinə yetirməsini gözləyirdim! Vəd verilmişdi ki, Aİ razılaşmanın özünə düşən hissəsini icra edəcək və razılığa əsasən tariflərini sıfıra endirəcək! Ona ölkəmizin 250 illik yubileyinə qədər vaxt verməyə razı oldum, əks halda, təəssüf ki, onların tarifləri dərhal daha yüksək səviyyəyə qalxacaq. Bu məsələyə diqqət yetirdiyi üçün təşəkkür edirəm”, — deyə Tramp qeyd edib.
Məryəm Quliyeva
