"Trampın şəffaflıq xətti yeni müzakirələr yaradır..."
ABŞ Müdafiə Nazirliyi Donald Trampın göstərişi ilə UNO (uçan naməlum obyektlər) və digər naməlum anomal hadisələrlə bağlı məxfi sənədlərin bir hissəsini ictimaiyyətə açıqlamağa başlayıb.
Moderator.az xəbər verir ki, bu barədə "unn.ua" nəşri yazıb.
Pentaqondan "X-fayllar" açıqlaması
Nəşr yazır ki, xüsusi yaradılan platformada artıq 162 sənəd yayımlanıb. Prosesə Ağ Ev, Pentaqon, NASA, FTB və digər kəşfiyyat strukturları cəlb olunub. Rəsmi açıqlamaya görə, məqsəd "maksimum şəffaflıqdır".
Pentaqonun yaydığı materiallar ABŞ-də illərdir müzakirə olunan UNO mövzusunu yenidən gündəmə gətirib. Sosial şəbəkələrdə və ekspert dairələrində sənədlərin həqiqətən nə dərəcədə sensasion olduğu barədə artıq geniş müzakirələr başlayıb.
Sirli görüntülər və izah olunmayan hadisələr
Açıqlanan materiallar arasında video və foto arxivlər, hərbi müşahidələr və NASA missiyalarına aid qeydlər yer alır. Sənədlərdən birində 2023-cü ildə şahid tərəfindən təsvir edilən "ellips formalı, metal rəngli və qəfil yox olan obyekt" qeyd olunur.
Digər materialda isə "Apollon-17" missiyası zamanı Ay səthinin üzərində üç işıq mənbəyi qeydə alınıb. Pentaqon bəzi hallarda bu hadisələrin izahının hələ də qeyri-müəyyən olduğunu, hətta "fiziki obyekt ola biləcəyi ehtimalını" da istisna etmədiyini bildirir.
Siyasi mesaj və ehtiyatlı yanaşma
Donald Tramp daha əvvəl də məxfi sənədlərin açıqlanacağını vəd etmişdi. Konqresdə isə bəzi respublikaçılar daha çox materialın yayımlanmasını tələb edir. Bununla belə, ekspertlər xəbərdarlıq edirlər ki, UNO görüntüləri çox vaxt yanlış şərh olunur və hər qeyri-adi hadisə mütləq yadplanetli texnologiya kimi qiymətləndirilməməlidir.
Pentaqonun 2024-cü il hesabatında da qeyd olunur ki, ABŞ hökumətinin yadplanetli texnologiyanı təsdiqləyən heç bir sübutu yoxdur. ABŞ-da UNO sənədlərinin açıqlanması həm şəffaflıq addımı kimi təqdim olunur, həm də yeni suallar və mübahisələr doğuraraq mövzunu yenidən gündəmə gətirir.
