BAKI, 9 may. TELEQRAF
Türk Dövlətləri Təşkilatının (TDT) Dövlət Başçıları Şurasının növbəti qeyri-rəsmi zirvə görüşü mayın 15-də türk dünyasının mənəvi paytaxtı Türküstan şəhərində keçiriləcək.
Teleqraf xəbər verir ki, bu barədə TDT-nin mətbuat xidməti məlumat yayıb.
Zirvə görüşünə Qazaxıstan sədrlik edəcək, türk dünyası liderlərinin toplantısının əsas mövzusu “Süni intellekt və rəqəmsal inkişaf”dır.
Zirvədə təşkilatın müşahidəçi ölkələrinin dövlət və hökumət başçıları da iştirak edəcək. Onlar sürətlə inkişaf edən rəqəmsal dövrdə əməkdaşlığın prioritet sahələrini müzakirə etməyi planlaşdırırlar.
Qeyri-rəsmi zirvə türk dövlətləri arasında davamlı iqtisadi artımı təşviq etmək, dövlət xidmətlərini təkmilləşdirmək və regional əlaqələri gücləndirmək üçün süni intellekt, rəqəmsal innovasiya və qabaqcıl texnologiyaların transformativ potensialından effektiv şəkildə necə istifadə etmək barədə strateji dialoqun inkişafı üçün mühüm platforma rolunu oynayacaq.
Zirvə proqramının bir hissəsi olaraq, Dövlət Başçıları Şurasının iclası ərəfəsində TDT Xarici İşlər Nazirləri Şurasının iclası da keçiriləcək.
