“Turan Tovuz” 21-ci mükafatçı, 23-cü təmsilçimiz oldu!

Azərbaycan Premyer Liqasının 2025/2026-cı illər mövsümünün 31-ci turunun “Karvan”la ev oyunu “Turan Tovuz” üçün əlamətdar olub.

Arena.az xəbər verir ki, bu oyunda Azərbaycan Premyer Liqasının 2025/2026-cı illər mövsümünün üçüncü mükafatçısı və ölkəmizin avrokuboklardakı daha bir təmsilçisi müəyyənləşib.

“Sabah”la “Qarabağ”ın ardından Tovuz klubu da bu uğura nail olub. Kurban Berdıyevin baş məşqçisi olduğu komanda “Karvan”la ev oyunundakı qələbə ilə (1:0) xallarının sayını 59-a çatdırıb. Bununla da Tovuz klubu ilk “üçlük”də yerini təmin edib.

Bu qələbədən sonra “Neftçi” və “Zirə” üçün əlçatmaz olan Qərb təmsilçisinin gümüş, yoxsa bürünc medallara sahib çıxacağı son 2 turda dəqiqləşəcək. İlk medalını təmin edən “Turan Tovuz” çempionatın tarixinə mükafat sahibi olan 21-ci komanda kimi düşüb.

Əvvəlki 33 mövsümdə (2001/02 mövsümü başa çatmayıb) 20 komanda mükafata yiyələnib. “Neftçi” hamıdan çox – 21 dəfə medalçılar sırasında yer alıb. “Qarabağ” cari mövsümdə özünün 20-ci mükafatını əldə etsə də, medalın əyarı hələ dəqiqləşməyib.

“Şamaxı”nın 9, “Kəpəz”lə “Bakı”nın hərəyə 6, “Qəbələ”nin 5, “Şəmkir”, “Xəzər Lənkəran” və “Zirə”nin hərəyə 4 mükafatı var. “Turan Tovuz”la eyni şəhərin – Tovuzun çempionatdakı ilk təmsilçisi “Turan”ın da eyni sayda – 4 medalı var: 1 qızıl, 1 gümüş və 2 bürünc.

İlk çempionluğunu bu il qazanmış “Sabah” 3-ə çatıbsa, “Xəzər” (Sumqayıt), “Xəzri”, “Karvan”ın hərəyə 2 medalı var. Digər komandalar “Turan Tovuz” kimi bir dəfə “üçlüy”ə düşüb: AZAL, “Simurq”, “Viləş”, “Səbail”, “Sumqayıt”, “Araz-Naxçıvan”.

İlk “üçlük”də yerini təmin edən Tovuz klubu həm də avrokuboklara vəsiqə qazanıb. Qitə səhnəsində debüt edəcək komandanın Avropa Liqası, yoxsa Avropa Konfrans Liqasında mübarizə aparacağı kubokun finalı və ya qarşıdakı turlardan asılı olacaq.

“Turan Tovuz” Azərbaycan futbolu tarixinə avrokuboklara (İntertoto kuboku da nəzərə alınmaqla) vəsiqə qazanmış 23-cü komanda kimi düşüb.

İndiyədək 22 komanda ölkəmizi Avropada təmsil edib: “Qarabağ”, “Neftçi”, “Şamaxı”, “Qəbələ”, “Sabah”, “Zirə”, “Bakı”, “Xəzər Lənkəran”, “Karvan”, “Kəpəz”, “MKT-Araz”, “Bakı fəhləsi”, “Şəmkir”, , “Araz-Naxçıvan”, AZAL, “Sumqayıt”, “Xəzri”, “Səbail”, “Simurq”, “Turan”, “Şəfa”, “Viləş”.

Tovuz avrokuboklarda 2-ci komanda ilə təmsil olunacaq. 1994-cü ildə Azərbaycanın avrokuboklardakı ilk təmsilçisi bu şəhərin komandası “Turan” olub.