"Bildiyiniz kimi, mayın 9-da faşizm üzərində Qələbənin 81 illiyi qeyd olundu. Qələbənin əldə edilməsinə Azərbaycan xalqı böyük töhfələr vermişdir. Müharibə dövründə Azərbaycandan 700 minə yaxın adam cəbhəyə çağırılmışdır. Azərbaycanlılardan ibarət 5 milli diviziya yaradılmışdır. 320 minə qədər həmvətənimiz döyüş meydanlarından geriyə qayıtmamışdır".
Redaktor.az xəbər verir ki, bu barədə Milli Məclisin sədri Sahibə Qafarova parlamentin 12 may 2026-cı il tarixində keçirilmiş plenar iclasında faşizm üzərində Qələbənin 81 illiyinə həsr olunmuş çıxışı zamanı bildirdi.
Onun sözlərinə görə, əsgər və zabitlərimiz döyüş meydanlarında misilsiz qəhrəmanlıq və şücaət göstəriblər:
"Həmvətənlərimiz 400 mindən çox döyüş ordenləri və medalları ilə təltif edilmiş, 130 nəfər Sovet İttifaqı Qəhrəmanı adına layiq görülmüşdür.
Müharibə illərində Azərbaycanın bütün iqtisadiyyatı ordunun ehtiyaclarına uyğunlaşdırılmışdı. Bakıdan cəbhəyə 75 milyon ton neft və 22 milyon ton benzin göndərilmişdir. Azərbaycan yanacağı Qələbənin əldə edilməsində əvəzsiz rol oynamışdır.
İkinci Dünya müharibəsinin veteranları dövlət tərəfindən hərtərəfli qayğı ilə əhatə olunmuşlar. Biz onlara möhkəm can sağlığı arzulayırıq. Müharibə dövründə həlak olmuş həmvətənlərimizin əziz xatirəsini ehtiramla yad edirik.
O müharibədən 75 il sonra Azərbaycan xalqının övladları qəhrəmanlıq ənənələrini İkinci Qarabağ müharibəsi günlərində də nümayiş etdirmişlər. Nəsillər arasında əlaqə, milli-mənəvi dəyərlərə sədaqət və öz torpağı uğrunda fədakarlıq xalqımızın yenilməz ruhunun rəmzinə çevrilmişdir".
NURİYYƏ
