Avropa təhlükəsizlik arxitekturasında ABŞ-dan asılılığın azaldılması zərurəti vurğulanıb...
Poliqon xəbər verir ki, İspaniyanın xarici işlər naziri Xose Manuel Albares Avropa İttifaqının (Aİ) özünün vahid ordusunu yaratmasının vacibliyini bildirib. Onun sözlərinə görə, Avropa artıq təhlükəsizlik və müdafiə məsələlərində ABŞ-dan asılı vəziyyətdə qalmaq riskini azaltmalıdır.
Nazir bu fikri “Politico” nəşrinə verdiyi açıqlamada səsləndirib. O qeyd edib ki, Avropa ölkələri hər səhər ABŞ-ın növbəti addımının nə olacağını düşünmək məcburiyyətində qalmamalıdır və bunun üçün vahid hərbi potensialın formalaşdırılması zəruridir.
Albaresin sözlərinə görə, belə bir addım Avropa İttifaqının ümumi müdafiə qabiliyyətini gücləndirməklə yanaşı, NATO daxilində mövcud balanslara da təsir göstərə bilər. O, Avropa hərbi inteqrasiyasının daha müstəqil strateji kursun formalaşmasına xidmət edəcəyini bildirib.
Bununla yanaşı, İspaniya XİN rəhbəri ABŞ-ı Avropanın tarixi müttəfiqi kimi xarakterizə edərək, iki tərəf arasında əlaqələrin strateji əhəmiyyətini də vurğulayıb. Lakin o, dəyişən qlobal təhlükəsizlik mühitində Avropanın öz müdafiə imkanlarını artırmasının qaçılmaz olduğunu qeyd edib.
Ekspertlərin fikrincə, Avropa İttifaqında vahid ordu ideyası uzun illərdir müzakirə olunsa da, siyasi və hərbi inteqrasiya fərqləri səbəbindən bu təşəbbüs hələlik real mexanizmə çevrilməyib.
Poliqon.info
