Vyanada keçirilən “Eurovision-2026” mahnı müsabiqəsinin ilk yarımfinalı siyasi etirazlar, texniki problemlər və tamaşaçı narazılığı ilə yadda qalıb.
Bizim.Media xəbər verir ki, çərşənbə axşamı axşamı “Wiener Stadthalle” səhnəsində 15 ölkə finala çıxmaq uğrunda mübarizə aparıb.
Müsabiqənin favoritləri arasında İsveç, Xorvatiya və Finlandiya yer alsa da, gecənin əsas diqqət mərkəzində İsrail təmsilçisi Noam Bettan olub.
O, “Michelle” adlı romantik kompozisiya ilə çıxış edib və siyasi gərginliyə baxmayaraq finala yüksəlib. Lakin İsrail təmsilçisinin çıxışı ziddiyyətli reaksiyalarla müşayiət olunub. Zaldakı tamaşaçıların bir hissəsi müğənnini alqışlayaraq onun adını səsləndirib, digər hissəsi isə onu fitə basıb və İsrail əleyhinə şüarlar səsləndirib.
Qəzza münaqişəsi fonunda “Eurovision” yenidən beynəlxalq siyasi mübahisələrin mərkəzinə çevrilib. Bu səbəbdən bir neçə ölkə, o cümlədən müsabiqənin tarixi rekordçularından olan İrlandiya builki şounu boykot edib.
Təşkilatçılar əvvəlcədən bildiriblər ki, auditoriyanın reaksiyasını gizlətməyəcək və ya boğmayacaqlar. Buna görə də etiraz səsləri canlı yayımda aydın eşidilib.
Daha sonra ORF və Avropa Yayım Birliyinin nümayəndələri qaydanı pozan bir neçə tamaşaçının təhlükəsizlik xidməti tərəfindən zaldan çıxarıldığını açıqlayıblar.
Gecənin digər ciddi problemi isə səs keyfiyyəti ilə bağlı olub.
Yayım başlayan kimi sosial şəbəkələrdə tamaşaçıların narazı şərhləri yayılıb. İzləyicilər musiqinin aparıcıların səsini üstələdiyini, şərhlərin çətin eşidildiyini və ümumi səs keyfiyyətinin zəif olduğunu yazıblar.
Bəzi istifadəçilər fon musiqisinin süni intellektlə hazırlanmış kimi səsləndiyini, səsin isə “boş”, “boğuq” və “çirkli” olduğunu bildiriblər.
Müsabiqə pərəstişkarlarının bir qismi texniki problemlərin hətta güclü çıxışların da təsirini azaltdığını qeyd edib.
Britaniya auditoriyası üçün daha bir məyusedici məqam Boy Corcun uğursuzluğu olub. Əfsanəvi sənətçi San-Marinonun nömrəsində qonaq ifaçı kimi çıxış etsə də, ölkənin finala yüksəlməsinə kömək edə bilməyib.
Bu isə onun beynəlxalq səhnəyə uğurlu dönüşünü gözləyən fanatlar arasında narazılıq yaradıb.
Finlandiya isə Pita Parkkonen və Linda Lampenius dueti ilə finala yüksələrək əsas qalib namizədlərindən biri statusunu möhkəmləndirib.
Beləliklə, “Eurovision-2026”nın ilk yarımfinalı musiqi bayramından çox, müasir siyasi gərginliklərin, ictimai narazılığın və texniki problemlərin əks olunduğu bir gecə kimi yadda qalıb.
Bizim.Media
