Dəniz blokadası tətbiq ediləndən bəri Birləşmiş Ştatların Hərbi Dəniz Qüvvələri (HDQ) İranla əlaqəsi olan 85 ticarət gəmisini saxlayıb və başqa istiqamətə yönləndirib.
"Far.Az" xəbər verir ki, bu barədə ABŞ Silahlı Qüvvələrinin Yaxın Şərqdəki Mərkəzi Komandanlığı (CENTCOM) "X" sosial şəbəkəsində məlumat yayıb.
"Birləşmiş Ştatların Mərkəzi Komandanlığı İran limanlarının Amerika blokadası şərtlərinin yerinə yetirilməsini ardıcıl və qəti surətdə təmin etməyə davam edir. ABŞ HDQ blokada rejiminə tam riayət olunması məqsədilə indiyədək 85 ticarət gəmisini başqa istiqamətə yönləndirib", - rəsmi bəyanatda qeyd olunub.
Cəmi bir neçə saat əvvəl komandanlıq 84 gəminin saxlanılması barədə məlumat vermişdi.
CENTCOM-un məlumatına görə, İran sahillərinin blokadası fasiləsiz olaraq gecə-gündüz rejimində həyata keçirilir. Hazırda əməliyyata ABŞ HDQ-nin 20-dən çox döyüş gəmisi, o cümlədən iki təyyarədaşıyan gəmi, dəniz piyadaları bölmələri olan üç iri desant gəmisi, Ərəbistan dənizi akvatoriyasındakı raket esminesləri və sahil zonası döyüş gəmiləri cəlb edilib. Bundan əlavə, əməliyyatda 100-ə yaxın aviasiya texnikası - qırıcılar, helikopterlər və yanacaqdolduran təyyarələr iştirak edir.
Xatırladaq ki, fevralın 28-də ABŞ və İsrail İrana qarşı hərbi əməliyyatlara başlayıb və bir sıra şəhərlərə hava zərbələri endirilib. Həmin gün zərbələr nəticəsində İranın Ali rəhbəri Əli Xamenei öldürülüb. İran buna cavab olaraq İsrail ərazisinə raket zərbələri endirib və Fars körfəzi ölkələrindəki ABŞ hərbi bazalarına hücum edib.
İran, ABŞ və onların müttəfiqləri aprelin 8-ə keçən gecə atəşkəs razılaşmasına nail olublar. Tramp sonradan atəşkəsi qeyri-müəyyən müddətə uzadıb.
Tərəflər münaqişəni həll etmək üçün Pakistanda danışıqlar aparıblar, lakin 11-12 apreldə keçirilən ilk raund heç bir nəticə verməyib.
ABŞ Tehrana təzyiq göstərmək üçün İran limanlarını və Hörmüz boğazından keçidi blokadaya alıb. İran da öz növbəsində Fars körfəzinə gedən gəmilər üçün Hörmüz boğazının blokadasını elan edib. Regionda dinamik şəkildə dəyişən vəziyyət qlobal enerji böhranına səbəb olub.
