Almaniyanın Görlits şəhərində məişət qazının partlaması nəticəsində çoxmənzilli yaşayış binası tamamilə dağılıb.
Moderator.az xəbər verir ki, bu barədə "Bild" nəşri məlumat yayıb.
Sakinlərin sözlərinə görə, güclü partlayış səsi eşidilib və ardınca bina uçaraq tarixi tikililərin sırasında böyük bir boşluq yaradıb. Polis və xilasetmə xidmətlərinin məlumatına əsasən, dağıntılar altında beş insanın qaldığı ehtimal edilir.
Hadisə yerinə yanğınsöndürənlər, polislər, ağır texnika və xüsusi təlim görmüş itləri olan kinoloqlar daxil olmaqla yardım xidmətləri cəlb olunublar. Görlits şəhərinin meri Oktavian Ursu bildirib ki, partlayışın qaz sızması səbəbindən baş verməsi ehtimalı nəzərdən keçirilir. Ərazidəki bütün kommunal xətlərin verilişi dayandırılıb. Yaxınlıqdakı üç binanın sakinləri təxliyə edilib, onlar müvəqqəti yaşayış yeri ilə təmin olunacaqlar.
