Mənzil təminatına doğru irəliləyişi formalaşdırmaq üçün ən güclü imkanlardan biri inteqrasiya olunmuş şəhərsalma planlaşdırılması ilə bağlıdır.
Missiya.Az "Report"a istinadən xəbər verir ki, bunu Dövlət Şəhərsalma və Arxitektura Komitəsinin Aparat rəhbərinin müavini, Bakıda keçirilən Ümumdünya Şəhərsalma Forumunun 13-cü sessiyasının (WUF13) milli əlaqələndiricisinin müavini Gülşən Rzayeva WUF13 çərçivəsində təşkil olunmuş "Qlobal Mənzil Böhranı: Plan Nədir?" adlı tədbirdə bildirib.
Onun sözlərinə görə, mənzil təminatı nəqliyyat, infrastruktur, iş yerləri, dövlət xidmətlərindən və iqlimə davamlılıqdan ayrı tutula və onlardan müstəqil şəkildə planlaşdırıla bilməz: "Mənzil təminatını infrastruktur və sosial xidmətlərlə birlikdə planlaşdıran şəhərlər daha güclü və daha əlçatan icmalar yaradırlar. Digər mühüm imkan isə torpaq idarəçiliyi ilə bağlıdır. Torpaq məsuliyyətlə idarə olunduqda və onun sosial-ekoloji funksiyası qorunduqda, mənzillərin maddi cəhətdən əlçatanlığı daha da asanlaşır".
