ain.az bildirir, Lent az portalına istinadən.
Çində ənənəvi külək turbinlərinə alternativ kimi yeni texnologiya sınaqdan keçirilib. Mühəndislər yer səthində deyil, daha yüksək hündürlüklərdə yerləşən güclü külək axınlarından enerji əldə etməyin yolunu tapıblar.
Lent.az xarici mediaya istinadla xəbər verir ki, Sichuan əyalətində yerləşən İbin şəhərində futuristik görünüşlü, dirijablı xatırladan qurğunun havaya qalxması müşahidə olunub.
Heliumla doldurulmuş bu aparat sərnişin daşımır, əksinə, möhkəm kabel vasitəsilə yerə bağlı vəziyyətdə qalaraq enerji istehsal edir.
S2000 adlanan sistem təxminən 2 min metr yüksəklikdə külək enerjisini toplamaq üçün hazırlanıb. Bu hündürlükdə hava axınları daha sabit və güclü olduğundan enerji istehsalı daha effektiv hesab olunur. Layihə "Beijing Linyi Yunchuan Energy Technology" şirkətinin mütəxəssisləri tərəfindən həyata keçirilib.
Sınaqlar zamanı aparat bir neçə saat ərzində sabit vəziyyətdə havada qala bilib və bu, sistemin təhlükəsiz işləyə biləcəyini sübut edib. Məlumatlara görə, qurğu ilk test uçuşu zamanı təxminən 385 kilovat-saat elektrik enerjisi istehsal edib. Bu isə orta hesabla bir evin demək olar ki, iki həftəlik enerji tələbatını ödəməyə kifayət edir.
Texniki baxımdan qurğu 60 metr uzunluğa, təxminən 40 metr hündürlük və enə malikdir. Onun daxilində küləyin təsiri ilə fırlanan bir neçə enerji bloku yerləşir və yaranan enerji xüsusi kabel vasitəsilə yerə ötürülür.
Mütəxəssislər bildirirlər ki, layihənin əsas çətinlikləri qurğunun çəkisi ilə heliumun qaldırıcı qüvvəsi arasında balansın qorunması və kabelin güclü küləklərə davamlı olmasıdır.
Qeyd olunur ki, bu texnologiya xüsusilə elektrik şəbəkəsindən uzaq ərazilər, məsələn, sərhəd məntəqələri üçün alternativ enerji mənbəyi kimi istifadə oluna bilər. Alimlər artıq bu cür uçan enerji stansiyalarının geniş şəbəkəsinin yaradılması üzərində çalışırlar.
Ekspertlərin fikrincə, bu sınaq bərpa olunan enerji sahəsində yeni mərhələnin başlanğıcı hesab oluna bilər.
Sonrakı hadisələr barədə daha çox məlumat almaq üçün ain.az saytını izləyin.
