Mətbəxlərin ən çox istifadə olunan və sevilən tərəvəzlərindən biri olan kartof, düzgün saxlanılmadıqda tez cücərir, yumşalır və ya yaşıl rəng alır. Bəs kartofu ilk günkü kimi təzə saxlamağın sirri nədir?
Pravda.az kartofların ömrünü uzadan üsulları təqdim edir:
Kartof və soğanı heç vaxt yan-yana qoymayın
Ən çox edilən səhvlərdən biri kartof və soğanı eyni səbətdə və ya yan-yana saxlamaqdır. Soğanlar ətrafa etilen qazı yayır. Bu qaz isə kartofların çox daha sürətlə cücərməsinə və çürüməsinə səbəb olur. Ona görə də bu ikilini mütləq bir-birindən uzaq tutmalısınız.
Səbətin içinə bir ədəd alma qoyun
Kartofların cücərməsinin qarşısını almaq üçün möcüzəvi bir üsul var: Alma! Kartof saxladığınız torbanın və ya səbətin içinə bir ədəd təzə alma qoyun. Almanı görən kartoflar daha gec cücərəcək və daha uzun müddət bərk qalacaq.
Qaranlıq və sərin mühit şərtdir
Kartof günəş işığı və rütubəti sevmir. İşığa məruz qalan kartoflarda solanin adlı zəhərli bir maddə ifraz olunur və kartofun qabığı yaşıl rəngə boyanır. Yaşıllaşmış kartofları yemək sağlamlıq üçün təhlükəlidir. Bu səbəbdən kartoflarınızı mütləq:
Qaranlıq,
Sərin (lakin soyuducu yox),
Və hava keçirən bir yerdə (məsələn, kətan torbada və ya taxta yeşikdə) saxlayın.
Soyuducuya qoymaq olmaz
"Daha yaxşı qalsın" deyə kartofu soyuducuya qoymaq böyük səhvdir. Soyuq mühit kartofun tərkibindəki nişastanın sürətlə şəkərə çevrilməsinə səbəb olur. Bu da həm kartofun dadını korlayır, həm də bişirərkən tez qaralmasına yol açır.
Yuyub saxlamayın
Kartofları marketdən və ya bazardan aldığınız kimi, yəni palçıqlı və torpaqlı şəkildə saxlamalısınız. Su ilə təmas kartofun nəmlənməsinə və göbələk xəstəliklərinin yaranmasına səbəb olur. Yumaq prosesini yalnız bişirmədən dərhal əvvəl etməlisiniz.
Qeyd: Əgər kartofların arasında yumşalmış və ya çürüməyə başlamış olanlar varsa, onları mütləq digərlərindən ayırın. Çünki bir dənə xarab kartof qısa zamanda ətrafındakı bütün kartofları çürüdə bilər.
Əminə Bayramova
