ABŞ Hizbullah-la əlaqəsi olan bir qrup Livan siyasətçisi və təhlükəsizlik rəsmilərinə qarşı sanksiyalar tətbiq etmək niyyətindədir.
Musavat.com xəbər verir ki, məlumatı "Əl-Cəzirə" telekanalı Dövlət Departamentindəki mənbəyə istinadən yayıb. Mənbə bildirib ki, "hədəfdə Hizbullah-ın silahsızlaşdırılması səylərinə mane olan və Livan dövlətinin ziyanına hərəkət edən" şəxslərdir. Mənbənin məlumatına görə, sanksiyalar səkkiz Livan vətəndaşına və bir İran diplomatına təsir göstərir.
Onların arasında parlament üzvləri Həsən Fədlallah, İbrahim əl-Musəvi, Hüseyn Həcc Həsən və keçmiş nazir Məhəmməd Fneiş də var. Təhlükəsizlik rəsmilərinin siyahısına ordu kəşfiyyatının rəisi də daxildir.
Beyrutun cənub ətrafı üzrə ordu kəşfiyyatının rəisi polkovnik Samer Hammadeh, Livan Daxili İşlər Nazirliyinin Baş Təhlükəsizlik İdarəsinin analitik mərkəzinin rəisi, briqada generalı Hattar Nəsrəddin, Hizbullah-ın müttəfiqi olan Şiə Əməl hərəkatının təhlükəsizlik xidmətinin rəisi Əhməd Baalbeki və bu hərəkatın cənubi Livandakı hərbi komandiri Əhməd Səfəvi də var.
Dövlət Departamentindəki mənbə vurğulayıb ki, "Livan hökumət strukturlarına nüfuz edən və Hizbullah-la əməkdaşlıq edən bütün rəsmilərə qarşı sanksiyalar tətbiq olunacaq".
Kanalın məlumatına görə, Vaşinqton Hizbullah-ın maliyyə mexanizmlərinin məhv edilməsinə səbəb olan məlumatlara görə 10 milyon dollar mükafat elan edib. “Əl-Cəzirə” qeyd edir ki, şiə yaraqlılarının hərbi əməliyyatları sülh səylərinə və Livanın suverenliyinin bərpasına mane olur.
Musavat.com
