Tətil planı qurulub, biletlər alınıb və o çoxdan gözlənilən an gəlib çatıb. Ən çətin mərhələ başlayır: Çamadanı hazırlamaq! "Birdən lazım olar" deyib çamadana doldurduğumuz, lakin tətil boyu heç toxunmadığımız geyimlər həm yükümüzü ağırlaşdırır, həm də çamadanda lazımsız yer tutur.
Bəs, tətilə gedərkən yanımıza mütləq almalı olduğumuz geyimlər hansılardır?
Pravda.az hər vəziyyətə uyğun çamadan hazırlamağın sirlərini təqdim edir:
Rahat və çoxyönlü geyimləri (şortiklər, şalvarlar, ətəklər)
Kombinasiya etməsi ən asan olan geyimləri seçmək işinizi yüngülləşdirəcək.
Şortiklər: Həm çimərlikdə, həm də gündüz gəzintilərində istifadə edə biləcəyiniz 2-3 ədəd şortik - biri cins, digərləri kətan və ya pambıq ola bilər.
Kətan şalvarlar: İsti yay axşamlarında həm qəşəng görünmək, həm də sərin qalmaq üçün neytral rəngli (ağ, bej) bir kətan şalvar xilaskarınız olacaq.
Uçuşan ətəklər: Həm rahat, həm də fotoşəkillərdə gözəl görünən uzun və ya midi ətəklər yay tətilinin imtinaedilməzlərindəndir.
Sərin və yüngül üst geyimləri (köynəklər, toplar)
Pambıq t-shirtlər və toplar: Gündəlik istifadə üçün hər şeylə uyğunlaşan sadə ağ, qara və rəngli t-shirtlər götürün.
Oversize (geniş kəsim) köynəklər: Kətan və ya nazik pambıq köynəkləri həm şortların üzərindən, həm də çimərlikdə bikinini üstündən geyinmək üçün istifadə edə bilərsiniz.
Tək geyim rahatlığı: donlar və kombinezonlar
Çamadanda ən az yer tutan və kombin hazırlamaq dərdi olmayan geyimlər donlardır.
Həm gündüz səndəllərlə, həm də axşam bir qədər qəşəng aksesuarlarla uyğunlaşdıra biləcəyiniz 3-4 ədəd uçuşan yay donu götürün.
Çimərlik geyimləri
Bikini və ya mayolar: Tətilin müddətindən asılı olaraq yanınızda ən az 2-3 ədəd mayo/bikini götürməyiniz məsləhətdir (biri quruyarkən digərini geyinə bilmək üçün).
Çimərlik donu: Çimərlik kafesinə gedərkən və ya gəzişərkən mayonun üzərindən geyinmək üçün praktik bir geyim.
Sərin axşamlar üçün müdafiə
Yay tətilininə getsəniz belə, axşamları dəniz kənarı və ya mehli hava sərin ola bilər.
Yanınızda mütləq nazik bir cins gödəkcə, hırka (kardigan) və ya şal götürün. Bunlar həm də təyyarədə, avtobusda kondisionerdən qorunmaq üçün faydalı olacaq.
Ayaqqabı seçimi (maksimum 3 cüt)
Çamadanı ən çox ağırlaşdıran ayaqqabılardır. Bu üçlü hər ehtiyacınızı qarşılayacaq:
İdman ayaqqabısı: Səfər zamanı və uzun piyada gəzintiləri üçün (bunu elə yola çıxarkən geyinə bilərsiniz).
Çimərlik başmaqları: Çimərlik və hovuz kənarı üçün.
Qəşəng bir səndəl: Axşam yeməkləri və gəzintiləri üçün həm rahat, həm də şık bir sandalet.
Aksesuarlar və alt geyimləri
Günəşdən qorunmaq üçün geniş kənarlı şlyapa və günəş eynəyi.
Tətil müddətinə uyğun sayda daxili çamaşırı və corab.
Qeyd: Geyimlərinizi çamadana qatlamaq yerinə bükərək (rulon formasına salaraq) yerləşdirin. Bu üsul həm geyimlərin daha az qırışmasını təmin edir, həm də çamadanda yarıbayarı yerə qənaət edir.
Əminə Bayramova
