ain.az bildirir, Bizimyol saytına əsaslanaraq.
Azərbaycançılıq ideologiyasının təbliği iqtisadi inkişaf prosesinə milli birlik və sosial həmrəylik üzərindən güclü təsir göstərir. Bu ideya cəmiyyətdə ortaq məqsəd və məsuliyyət hissini gücləndirərək iqtisadi təşəbbüslərə daha geniş ictimai dəstək formalaşdırır. Fransız sosioloqu Emil Durkheimin vurğuladığı “mexaniki həmrəylik” anlayışı milli cəmiyyətlərdə ortaq dəyərlərin iqtisadi və sosial sabitliyin əsas dayağı olduğunu göstərir.
Azərbaycançılıq təkcə ideoloji xətt deyil, həm də iqtisadi dayanıqlığın güclənməsinə xidmət edən mühüm sosial amildir. Müasir beynəlxalq münasibətlər sistemində milli ideologiya anlayışı artıq yalnız mədəni və siyasi kimlik məsələsi kimi deyil, eyni zamanda dövlətlərin iqtisadi dayanıqlığını və inkişaf modelini müəyyən edən strateji faktor kimi qiymətləndirilməlidir. Müstəqillikdən sonra formalaşan Azərbaycançılıq ideologiyası ölkənin yalnız milli birliyinin qorunmasında deyil, həm də iqtisadi inkişaf strategiyasının formalaşdırılmasında mühüm rol oynamışdır. Xüsusilə beynəlxalq geosiyasi risklərin, iqtisadi böhranların və regional təhlükəsizlik problemlərinin artdığı dövrdə ideoloji birlik dövlətin iqtisadi davamlılığını gücləndirən əsas sütunlardan birinə çevrilib.
İqtisadçı Əli Səlimov Bizimyol.info xəbər portalına açıqlamasında bildirib ki, Azərbaycançılıq ideologiyası ilk növbədə ölkədə siyasi və ictimai sabitliyin formalaşmasına təsir göstərib: “İqtisadi inkişafın əsas şərtlərindən biri məhz sabit daxili mühitdir. Dövlətə inamın, milli həmrəyliyin və ortaq strateji məqsədlərin mövcud olduğu ölkələr uzunmüddətli iqtisadi proqramları daha effektiv şəkildə həyata keçirə bilir. Azərbaycanın son illərdə enerji, nəqliyyat-logistika və qeyri-neft sektorunda həyata keçirdiyi genişmiqyaslı layihələr də məhz bu institusional və ideoloji sabitlik əsasında mümkün olub. Burada əsas məqamlardan biri ondan ibarətdir ki, iqtisadi strategiyaların davamlılığı üçün cəmiyyət daxilində vahid dövlətçilik yanaşmasının mövcudluğu xüsusi əhəmiyyət daşıyır”.
İqtisadçının fikrincə, Azərbaycançılıq ideologiyasının iqtisadi inkişafla əlaqəsi bir neçə istiqamətdə özünü göstərir: “İlk növbədə milli ideyanın güclənməsi ölkənin investisiya cəlbediciliyini artırır. Xarici investorlar üçün əsas prioritetlər sırasında siyasi sabitlik, sosial təhlükəsizlik və dövlət institutlarına etimad xüsusi yer tutur. Daxili parçalanmaların və ciddi sosial qarşıdurmaların olmadığı ölkələr investorlar tərəfindən daha etibarlı bazar kimi qiymətləndirilir. Azərbaycanın uzun illər ərzində regional iqtisadi layihələrdə etibarlı tərəfdaş kimi çıxış etməsi də məhz daxili sabitlik və milli birlik faktorları ilə sıx bağlıdır.
Digər mühüm məqam isə ideoloji birliyin insan kapitalının inkişafına təsiridir. Müasir iqtisadiyyat artıq yalnız təbii resurslara deyil, bilik, innovasiya və insan resurslarının keyfiyyətinə əsaslanır. Azərbaycançılıq ideologiyası çərçivəsində vətəndaş məsuliyyəti, dövlətçilik düşüncəsi və milli maraqların qorunması kimi prinsiplərin təşviqi cəmiyyətin inkişaf proseslərinə daha fəal şəkildə qoşulmasına şərait yaradır. Bu isə xüsusilə təhsil, innovasiya, sahibkarlıq və rəqəmsal iqtisadiyyat istiqamətlərində uzunmüddətli inkişaf üçün vacib amildir”.
Əli Səlimov vurğulayıb ki, bununla yanaşı, ideoloji birlik regionlararası inkişaf balansının qorunması baxımından da mühüm rol oynayır: “İqtisadi inkişaf yalnız paytaxt və iri şəhərlərlə məhdudlaşdıqda sosial fərqlər dərinləşir və bu, uzunmüddətli perspektivdə iqtisadi dayanıqlığa mənfi təsir göstərə bilər. Azərbaycançılıq ideyası isə vahid milli məkan konsepsiyasını gücləndirməklə regionların sosial-iqtisadi inkişafının ümumi dövlət siyasətinin tərkib hissəsinə çevrilməsini təşviq edir”.
“Mövcud geosiyasi tendensiyalar onu göstərir ki, məsələ daha strateji xarakter alır. Dünyada enerji təhlükəsizliyi, nəqliyyat marşrutları və iqtisadi təsir uğrunda rəqabətin artdığı şəraitdə daxili sabitliyini və milli birliyini qoruyan dövlətlər daha dayanıqlı mövqe qazana bilir. Azərbaycanın beynəlxalq enerji və tranzit layihələrində artan rolu da göstərir ki, iqtisadi güc yalnız resurs potensialı ilə deyil, eyni zamanda güclü dövlətçilik modeli və ideoloji həmrəyliklə formalaşır.\
Azərbaycançılıq ideologiyası müasir mərhələdə təkcə milli kimlik modeli deyil, həm də ölkənin iqtisadi inkişaf strategiyasını dəstəkləyən mühüm siyasi və institusional mexanizmdir. Milli birlik, ictimai sabitlik və dövlətçilik dəyərlərinin möhkəmlənməsi investisiya mühitinin yaxşılaşmasına, iqtisadi islahatların davamlılığına və uzunmüddətli inkişaf strategiyalarının daha effektiv həyata keçirilməsinə imkan yaradır”-deyən iqtisadçı bildirib ki, bu baxımdan ideoloji həmrəylik Azərbaycanın iqtisadi dayanıqlılığını gücləndirən əsas strateji faktorlar sırasında qiymətləndirilməlidir.
İradə Cəlil, Bizimyol.info
Azərbaycan Respublikasının Medianın İnkişafı Agentliyi (MEDİA)
Məqalə, Medianın İnkişafı Agentliyinin onlayn media subyektlərinə (veb-saytlara) maliyyə dəstəyi əsasında hazırlanıb.
İstiqamət: 6.3.9. azərbaycançılıq ideyasının təbliği.
Məqalə, Medianın İnkişafı Agentliyinin onlayn media subyektlərinə (veb-saytlara) maliyyə dəstəyi əsasında hazırlanıb.
İstiqamət: 6.3.9. azərbaycançılıq ideyasının təbliği.
Ən son yeniliklər və məlumatlar üçün ain.az saytını izləyin, biz hadisənin gedişatını izləyirik və ən aktual məlumatları təqdim edirik.
