ain.az, Bizimyol saytından verilən məlumata əsaslanaraq xəbər yayır.
İran İslam Respublikasının Prezidenti Məsud Pezeşkian bildirib ki, İran beynəlxalq hüquq çərçivələrinə sadiqliyini əməli şəkildə nümayiş etdirib və ölkəsi yalnız xalqının legitim və qanuni hüquqlarını qorumağa çalışır. O qeyd edib ki, ABŞ ilə danışıqlarda əvvəlki təcrübələr maksimum ehtiyatlı davranmağın vacibliyini göstərir.
Bizimyol.info xəbər verir ki, Prezident Pezeşkian bu fikirləri bu gün Pakistan İslam Respublikası Quru Qoşunlarının komandanı Asim Munirlə keçirdiyi görüş zamanı səsləndirib.
O, Pakistan hökuməti və xalqına bölgədə sabitlik və təhlükəsizliyin qorunmasına yönəlmiş səylərinə görə təşəkkür edərək bildirib: “Pakistan xalqı və rəsmiləri bizim qardaşlarımızdır. Sizə səmimi bağlılığımız var. Biz müsəlmanlar vahid bir bədən kimiyik və birlikdən başqa yolumuz yoxdur. Əməkdaşlıq edərək həm öz vəziyyətimizi, həm də dünya müsəlmanlarının şəraitini yaxşılaşdırmağa çalışmalıyıq”, deyə o qeyd edib.
Pezeşkian İslam dünyasında birlik və həmrəyliyin konkret addımlarla gücləndirilməsinin vacibliyini vurğulayaraq iqtisadi, sosial, siyasi və mədəni əlaqələrin daha da inkişaf etdirilməsinə çağırış edib. O bildirib ki, İslam ölkələrinin xalqları arasında əməkdaşlığın artırılması praktik birliyin möhkəmlənməsi və münaqişə ilə qarşıdurma zəmininin aradan qaldırılması baxımından ən mühüm amildir.
Prezident müharibənin heç bir tərəfə fayda gətirmədiyini deyərək: “ABŞ bu qarşıdurmadan qalib çıxmayacaq. Ağır bədəli isə bölgə ölkələri və dünya ödəyəcək. Sionist rejim isə bölgədə yalnız öz maraqlarını müharibə vasitəsilə təmin etməyə çalışan yeganə tərəfdir”, - deyə əlavə edib.
Pezeşkian İran xalqının ABŞ-yə qarşı etimadsızlığının səbəbinin dəfələrlə verilən vədlərin pozulması, danışıqlar zamanı həyata keçirilən hücumlar və rəsmilərə qarşı sui-qəsdlər olduğunu bildirib.
Pakistan Quru Qoşunlarının komandanı Asim Munir də görüşdə İran Prezidenti ilə yenidən bir araya gəlməkdən məmnunluğunu ifadə edib və Pakistanın Baş naziri ilə Prezidentinin səmimi salamlarını Pezeşkiana çatdırıb.
Munir danışıqlar prosesinin müsbət istiqamətdə davam etdiyini bildirərək İran Prezidentinin mövqeyini yüksək qiymətləndirdiyini deyib.
Asim Munir vurğulayıb ki, əsas məqsədləri bölgədə sabitliyin təmin olunması, müharibə və qarşıdurmaların davam etməsinin və ya yenidən baş verməsinin qarşısının alınmasıdır.
Bizimyol.info
Hadisənin gedişatını izləmək üçün ain.az saytında ən son yeniliklərə baxın.
