BAKI, 24 may. TELEQRAF
Ermənistan hökuməti Azərbaycan və Türkiyə sərhədlərinə gedən dəmir yollarını öz vəsaitləri hesabına bərpa edəcək.
Teleqraf xəbər verir ki, bu barədə Ermənistanın baş naziri Nikol Paşinyan Şirak bölgəsində keçirilən seçkiqabağı görüş zamanı bəyan edib.
Teleqraf xəbər verir ki, bu barədə Ermənistanın Baş naziri Nikol Paşinyan Şirak vilayətində keçirilən seçkiqabağı görüşdə bildirib.
Paşinyanın sözlərinə görə, yaxın vaxtlarda Ermənistan tərəfi Gümrü-Axurik və Axurik–Türkiyə sərhədi istiqamətində bərpa işlərinə başlayacaq.
“Türkiyə tərəfində işlər artıq başlayıb və dəmir yolu açılacaq. Biz də Yerask qovşağının yenidən qurulmasına başlayacağıq. Bu işi Ermənistan hökuməti öz üzərinə götürəcək. Baxmayaraq ki, konsessiya müqaviləsi var, investisiyanı biz edəcəyik, dəmir yolunu təmir edib bərpa edəcəyik və xətt istifadəyə veriləcək”, - Paşinyan deyib.
Qeyd edək ki, 2008-ci il fevralın 13-də Yerevanda “Rusiya Dəmir Yolları” şirkəti ilə Ermənistan hökuməti arasında ölkənin dəmir yolu sisteminin “Cənubi Qafqaz Dəmir Yolu” şirkətinin idarəçiliyinə verilməsi barədə konsessiya müqaviləsi imzalanıb.
Müqaviləyə əsasən, idarəetmə müddəti 30 il nəzərdə tutulub və qarşılıqlı razılıq əsasında daha 10 il uzadıla bilər.
Paşinyan 2025-ci ilin dekabrında Sankt-Peterburqda Rusiya Prezidenti Vladimir Putinlə görüşündə Ermənistanın Azərbaycan və Türkiyə ilə dəmir yolu əlaqələrinin bərpasının vacibliyini vurğulamışdı.
O, rus tərəfdaşlardan Yeraskdan Azərbaycan sərhədinədək, Axurikdən Türkiyə sərhədinədək və İcevan istiqamətində dəmir yolu xətlərinin bərpasında iştirak etmələrini xahiş etmişdi.
