Bir çox insan səhər gözünü açan kimi ilk olaraq telefona baxır. Lakin mütəxəssislər bildirirlər ki, bu vərdiş beynin stress səviyyəsini artıraraq gün ərzində yorğunluq və diqqət dağınıqlığı yarada bilər.
AzPost xarici mediaya istinadən xəbər verir ki, London Universitet Kollecində aparılan araşdırmaya görə, səhər ilk dəqiqələrdə sosial şəbəkələrə və xəbərlərə baxmaq beyində kortizol hormonunun səviyyəsini artırır.
Psixoloq Emma Palmer bildirir ki, insan beyni oyandıqdan sonra ilk 20-30 dəqiqədə daha həssas vəziyyətdə olur.
“Bu vaxt beyinə çoxlu informasiya yüklənməsi stress reaksiyasını sürətləndirir və diqqət sistemini zəiflədir”, – deyə mütəxəssis bildirib.
Araşdırmada qeyd olunur ki, səhər telefon istifadə etməyən insanlarda gün ərzində konsentrasiya və məhsuldarlıq daha yüksək olub.
Mütəxəssislər oyandıqdan sonra ilk yarım saatda su içməyi, qısa gəzinti etməyi və təbii işığa çıxmağı tövsiyə edirlər.
