BAKI, 25 may. TELEQRAF
Çexiya hökuməti ukraynalı qaçqınların yaşayış və maliyyə dəstəyi ilə bağlı qaydaları sərtləşdirən qanunvericiliyə düzəlişi təsdiqləyib.
Teleqraf "Reuters"ə istinadən xəbər verir ki, hökumət bunun yardımdan sui-istifadə hallarına və qaçqınlara yerli sakinlərdən daha üstün rəftar verildiyinə dair artan ictimai rəyə cavab olduğunu irəli sürüb.
Daxili işlər naziri Lubomir Metnar mətbuat konfransında bildirib ki, mart ayına kimi ölkə 385 min ukraynalı qaçqını qəbul edib.
Avropa İttifaqının statistikasında da Çexiya Qitədə adambaşına düşən ən çox ukraynalı qaçqını qəbul edən ölkə kimi göstərilir.
Metnarın sözlərinə görə, hökumət humanitar yardımın verilməsi qaydalarını sərtləşdirməyə və ölkədə daimi sakin olmayanları proqramdan kənarlaşdırmaq üçün yaşayış icazəsi verməyə çalışır.
Onun sözlərinə görə, bu, həm yardımın özündən, həm də qaçqın statusundan sui-istifadə hallarının qarşısını alacaq.
Bundan əlavə, hakimiyyət orqanları Ukrayna dövlət nömrə nişanlı avtomobillərin məcburi avtonəqliyyat vasitələrinin yoxlanılmasından azad edilməsi haqqında müddəanı ləğv edəcək.
Metnar həmçinin bildirib ki, qorunan şəxslərin siyahısının daraldılması yönündə təkliflər Aİ-nin qaçqınlar üçün müvəqqəti müdafiə statusunun 2027-ci ilin martından sonra uzadılması ilə bağlı müzakirələrinin bir hissəsi kimi nəzərdən keçirilə bilər. Bu müddəa konkret olaraq, hərbi yaşda olan ukraynalı kişilərin Çexiyadan çıxarılmasını nəzərdə tutur.
