Tehran gəmilərdən tranzit haqqı almayacağını bildirib, lakin təhlükəsizlik, ekoloji mühafizə və dəniz idarəçiliyi ilə bağlı xərclərin gəmi sahibləri tərəfindən ödəniləcəyini vurğulayıb...
İran həmçinin Avropanın boğazın idarə edilməsində iştirakı barədə xəbərləri də təkzib edib.
Poliqon xəbər verir ki, Iran Xarici İşlər Nazirliyinin sözçüsü Esmail Baqai Hörmüz boğazından keçən gəmilər üçün tranzit rüsumlarının tətbiq edilməyəcəyini açıqlayıb. Bununla belə, diplomat qeyd edib ki, gəmi sahibləri təhlükəsizlik, ətraf mühitin qorunması və dəniz nəqliyyatının idarə olunması ilə bağlı xərcləri ödəməli olacaqlar.
Baqainin sözlərinə görə, İran beynəlxalq gəmiçilik marşrutlarının fəaliyyətini məhdudlaşdırmaq niyyətində deyil və tranzit keçidlərə əlavə fiskal maneələrin yaradılması planlaşdırılmır. Bununla yanaşı, Hörmüz boğazında təhlükəsizliyin təmin olunması, dəniz ekosisteminin qorunması və idarəetmə infrastrukturu üçün maliyyə mexanizmlərinin tətbiqi nəzərdə tutulur.
İranlı diplomat vurğulayıb ki, Iran və Oman Hörmüz boğazına sahilyanı iki dövlət kimi bu strateji dəniz keçidinin təhlükəsizliyinə görə əsas məsuliyyəti daşıyır. O, Avropa dövlətlərinin və ya Avropa institutlarının boğazın idarə olunmasına cəlb edilə biləcəyi barədə yayılan məlumatları da təkzib edib.
Baqai bildirib ki, Hörmüz boğazının təhlükəsizliyi regional məsələdir və bu istiqamətdə qərarların ilk növbədə sahilyanı ölkələr tərəfindən verilməsi vacibdir. Onun fikrincə, regiondan kənar aktorların idarəetmə prosesində iştirakı barədə iddialar reallığı əks etdirmir.
Qeyd edək ki, bu açıqlamadan təxminən bir həftə əvvəl İran Hörmüz boğazının idarə olunmasına cavabdeh olacaq yeni dövlət agentliyinin yaradıldığını elan etmişdi. Yeni qurumun boğazda gəmi hərəkətinin koordinasiyası, təhlükəsizlik prosedurlarının icrası, ekoloji nəzarət və logistika proseslərinin tənzimlənməsi ilə məşğul olacağı bildirilir.
Hörmüz boğazı dünya enerji bazarı üçün strateji əhəmiyyət daşıyan əsas dəniz marşrutlarından biri hesab olunur. Qlobal neft və mayeləşdirilmiş təbii qaz tədarükünün əhəmiyyətli hissəsi bu keçid vasitəsilə daşındığından, boğazla bağlı hər hansı qərar beynəlxalq enerji bazarlarında və dəniz nəqliyyatı sektorunda diqqətlə izlənilir.
Poliqon.info
