Bakıda oğurluqda təqsirləndirilən dəstə üzvləri Üzeyir Bayramov, Niyazi Məmmədov və Namik Bayramovun barəsindəki qərardan yenidən kassasiya şikayəti verilib.
Pravda.az-ın əldə etdiyi məlumata görə, şikayət Ali Məhkəmənin hakimi Şahin Yusifovun sədrliyi ilə araşdırılacaq.
İttihama görə, hadisə 23 yanvar 2018-ci il tarixdə Bakı şəhəri, Suraxanı rayonu Dədə Qorqud qəsəbəsində yerləşən evlərdən birində qeydə alınıb.
Belə ki, Bakı şəhər sakinləri, əvvəllər məhkum olunmuş Üzeyir Bayramov, Niyazi Məmmədov və Namik Bayramov Türkiyə vətəndaşı olan iş adamı Selçuk Mahmud oğlu Tapanın yaşadığı evdən 193 095 manat pul oğurlayıblar. Bakı şəhər Baş Polis İdarəsinin əməkdaşları tərəfindən oğurluq hadisəsini törətməkdə şübhəli bilinən şəxslər saxlanılıb.
Araşdırmalar zamanı müəyyən edilib ki, qeyd edilən evdən oğurluq etmək təklifi əvvəlcə Üzeyir Bayramovdan gəlib. Onlar hadisə günü Niyazi Məmmədovun avtomobili ilə oğurluq edəcəkləri evə yollanıblar. Hadisədən sonra isə əldə etdikləri ev sahibinə məxsus pul vəsaitlərini aralarında bölüblər.
Bakı Ağır Cinayətlər Məhkəməsinin hökmü ilə Üzeyir Bayramov 6 il 3 ay, Namik Bayramov 5 il 9 ay və Niyazi Məmmədov isə 5 il 1 ay 15 gün müddətinə azadlıqdan məhrum edilib. Hər üç şəxs məhkəmə zalından həbs olunub. Bakı Apellyasiya Məhkəməsi şikayəti təmin etməyib. Ali Məhkəməsnin qərarına əsasən, kassasiya şikayəti təmin edilməyib.
Kamal Məmmədov
