“Uğur istedad deyil, vərdişlər toplusudur”: hazırda bütün dünyanın danışdığı kitabdan 8 qayda

Məşhur terapevt və motivasiya kouçu Marisa Pirin yeni kitabı artıq Böyük Britaniyada bestsellerə çevrilib. Müəllif illərlə olimpiya çempionları, milyarderlər, məşhurlar və top-menecerlərlə işləyib və indi onun sözlərinə görə, uğurlu insanları digərlərindən fərqləndirən vərdişləri bir kitabda toplayıb.

Kitabın əsas ideyası sadədir: “hər şeyə sahib olmaq” nə şansdır, nə də sehr. Bu, müəyyən düşüncə və davranış modelidir. Onun tövsiyələrinin ən dəyərli xülasəsi budur.

Ən xoşagəlməz işi əvvəl edin

İnsanların çoxu çətin zəngləri, ağır söhbətləri və ya mürəkkəb tapşırıqları axşama saxlayır. Uğurlu insanlar isə əksinə davranırlar. Onlar ən xoşagəlməz işi səhərdən həll etməyə çalışırlar. Bu, nəzarət hissi yaradır və bütün gün üçün zehni yüngülləşdirir.

Narhatlığa öyrəşin

Demək olar ki, hər ciddi məqsəd insanın adət etdiyi hansısa rahatlıqdan imtina etməsini tələb edir. Gözəl bədən istəyirsinizsə, bəzi zövqlərdən keçməli olacaqsınız. Öz biznesinizi qurmaq istəyirsinizsə, narahatlığa, yorğunluğa və rutinə dözməli olacaqsınız. Uğur nadir hallarda rahatlıqla gəlir.

Hər gün ən azı bir addım atın

Uğurlu insanlar hətta istirahət günündə belə irəliyə ən azı bir millimetr gedirlər: peşəkar məqalə oxuyurlar, məktuba cavab verirlər, faydalı video izləyirlər, vacib zəng edirlər. Kiçik addım belə hərəkət hissini qoruyur.

Rədd cavabını son kimi qəbul etməyin

Marisa Pirin sözlərinə görə, bir çox məşhur və varlı insan onlarla dəfə “yox” cavabı eşidib. Fərq ondadır ki, onlar bunu məğlubiyyət kimi yox, “hələ yox” kimi qəbul ediblər.

Zövqü təxirə salmağı öyrənin

Ən güclü bacarıqlardan biri əvvəl çətin işi görmək, yalnız sonra özünü qəhvə, serial, alış-veriş və ya istirahətlə mükafatlandırmaqdır. Mükafatı gözləməyi bacaran insanlar adətən daha böyük nəticələr əldə edirlər.

Güclü tərəfləriniz haqqında danışmaqdan çəkinməyin

Bir çox insan illərlə imposter sindromu ilə yaşayır. Müəllif bunu inkişafın dayanmasının əsas səbəblərindən biri sayır. Uğurlu insanlar sakit və rahat şəkildə belə deməyi bacarırlar: “Bəli, mən öz işimi yaxşı görürəm”. Bu, lovğalıq yox, özünəinamdır.

Özünüzü özünüz tərifləyin

Əvvəllər insanı rəhbər və ya ətrafı motivasiya edirdi. Bu gün isə bir çoxları uzaqdan işləyir və demək olar ki, geribildirim almır. Buna görə də insanın özünü özü dəstəkləməyi öyrənməsi vacibdir. Hətta sadə “mən bunu çox yaxşı etdim” cümləsi belə zamanla daxili vəziyyəti dəyişir.

Motivasiya hərəkətdən sonra gəlir

Kitabın ən gözlənilməz fikirlərindən biri budur: ilhamı gözləmək mənasızdır. Əvvəlcə başlamaq lazımdır, motivasiya isə sonra gəlir. Hətta 15 dəqiqəlik fəaliyyət belə beyni “işə sala” və insanı prosesə daxil edə bilər.

Marisa Pir hesab edir ki, uğur nə anadangəlmə hədiyyədir, nə də seçilmişlər üçün imtiyaz. Bu, əzələ kimi məşq etdirilə bilən vərdişlər sistemidir. Məhz buna görə də onun kitabı indi sosial şəbəkələrdə və biznes mühitində fəal müzakirə olunur.