Qalatidəki PUA hadisəsindən sonra Böyük Britaniya Rumıniyaya əlavə qırıcı təyyarələr yerləşdirə bilər.
Bu barədə Böyük Britaniyanın Müdafiə Naziri Con Heli bildirib.
"Kral Hərbi Hava Qüvvələrinin təyyarələri artıq NATO-nun hava polisini dəstəkləmək üçün Rumıniyada yerləşdirilib. Lazım gələrsə, bu mövcudluğu gücləndirmək üçün NATO Baş Katibi ilə birlikdə çalışacağıq", - deyə Müdafiə Naziri açıqlamasında bildirib.
"The Times" qəzetinin məlumatına görə, dörd "Typhoon" qırıcı təyyarəsindən ibarət qrup dörd aylıq hava polisi missiyasının bir hissəsi olaraq artıq Rumıniyadadır.
29 mayda Rumıniya Müdafiə Nazirliyi Qalatidəki bir yaşayış binasının damına dronun düşməsi barədə məlumat verib. Buxarest Rusiyanı günahlandırıb.
Rusiya Prezidenti Vladimir Putin Astanada TASS-ın sualına cavab olaraq bildirib ki, Rumıniyadakı hadisə, çox güman ki, Ukrayna PUA-sı ilə əlaqəli olub. O xatırladıb ki, əvvəllər Avropa ölkələrində Ukrayna Silahlı Qüvvələrinin dronlarının düşməsi halları olub və "bu halda, çox güman ki, biz məhz bununla məşğul oluruq". Putin vurğulayıb ki, əgər dronun qalıqları Rusiyaya təhvil verilərsə, Rusiya obyektiv araşdırma aparmağa hazırdır və yalnız belə bir araşdırmadan sonra baş verənləri qiymətləndirmək mümkün olacaq.
Rusiya Xarici İşlər Nazirliyinin sözçüsü Mariya Zaxarova isə TASS-a bildirib ki, qərblilər Rumıniyada dronun ətrafındakı təbliğatdan diqqəti Vladimir Zelenskinin Starobilskdə uşaqları öldürməsindən yayındırmaq, eləcə də Rusiyanın Konstansadakı Baş Konsulluğunun bağlanmasını haqlı çıxarmaq üçün istifadə edirlər.
SAMİRƏ
