Quterreş Putin və Ərdoğana Qara dənizdə daşımalarla bağlı məktublar göndərib

Fevralda BMT-nin baş katibi Antonio Quterreş Rusiya, Türkiyə və Ukrayna prezidentləri Vladimir Putin, Rəcəb Tayyib Ərdoğan və Vladimir Zelenskiyə Qara dənizdə gəmiçiliyin təhlükəsizliyini təmin etmək təklifləri ilə məktublar göndərib. Bizimyol.info xəbər verir ki, bu barədə mətbuata dünya təşkilatının rəhbərinin rəsmi nümayəndəsi Stefan Düjarrik məlumat verib. “Açıq ticarəti, qida axınını və təhlükəsiz daşınmanı qorumaq üçün bütün tərəflərlə müzakirələrimizi davam etdiririk. Bununla bağlı fevral ayında baş katib Rusiya Federasiyası, Türkiyə və Ukrayna prezidentlərinə məktublar göndərib. Məktublarda Quterreş qeyd edib ki, “mülki naviqasiya azadlığı BMT-nin bu istiqamətdə davam edən səylərinin əsas mövzusu olaraq qalır” və “qida və ticarət yolları təhlükəsiz, davamlı və proqnozlaşdırıla bilən olmalıdır”, - deyə Düjarrik bildirib. Düjarrik vurğuladı ki, Qara Dəniz Taxıl Təşəbbüsünün dərslərini nəzərə alaraq, BMT Qara dənizdə kommersiya daşımalarının risklərini daha da azaltmaq üçün Rusiya Federasiyası, Türkiyə, Ukrayna və digər müvafiq tərəflərlə fəal əlaqəni davam etdirir. Cümə günü Rusiya xarici işlər nazirinin müavini Sergey Verşinin Türkiyənin Qara dənizdə gəmiçiliklə bağlı təşəbbüsünü şərh edərək, bunun taxıl müqaviləsi ilə bağlı olmadığına işarə edib. O, həmçinin “dinc yük gəmilərinin keçməli olduğu humanitar dəhlizdən Kiyev rejimi tərəfindən Rusiya hədəflərinə qarşı terror aktları həyata keçirmək üçün istifadə edildiyinə” diqqət çəkib. Verşinin bildirib ki, Ərdoğan daha əvvəl Qara dənizdə kommersiya gəmiçiliyinin təhlükəsizliyini təmin etmək üçün müqavilə bağlamaq zərurətini bəyan edib. Nazir müavininin sözlərinə görə, bu kontekstdə BMT ilə əməkdaşlıq çərçivəsində təmaslar Qara dənizdə naviqasiyanın təhlükəsizliyini təmin etmək üzrə öhdəlikləri özündə əks etdirən yeni qaydaların hazırlanmasını davam etdirir. Taxıl müqaviləsi 2023-cü il iyulun 17-də başa çatıb. Ukrayna taxılını daşıyan gəmilər üçün Qara dəniz dəhlizi ilə bağlı 2022-ci ilin iyulunda bağlanmış müqavilənin müddətini bir neçə dəfə uzadan Rusiya müqavilənin ona aid olan hissəsinin – kənd təsərrüfatı məhsullarının ixracına maneələrin aradan qaldırılmasının heç vaxt yerinə yetirilmədiyini xatırladıb. Moskva onu da diqqətə çatdırıb ki, müqavilələr ən kasıb ölkələrə ərzaq göndərilməsi üçün nəzərdə tutulsa da, Ukraynadan gələn taxılın əsas hissəsi inkişaf etmiş Qərb ölkələrinə gedib. Rusiya prezidentinin mətbuat katibi Dmitri Peskov qeyd edib ki, Rusiya sövdələşməyə qayıtmağa hazırdır, ancaq Moskva ilə bağlı hissə yerinə yetirildikdə. Qadir, Bizimyol.info