Azertag saytından alınan məlumata görə, ain.az bildirir.
Bakı, 17 iyun, Anara Axundova, AZƏRTAC
IV Bakı Piano Festivalı çərçivəsində “Rotunda Roof Garden”də Türkiyənin “Altera Ensemble” qrupunun, eləcə də rəqqaslar Kamran Babayev və Ezgi Erin iştirakı ilə tanqo gecəsi böyük uğurla keçirilib.
AZƏRTAC xəbər verir ki, gecənin qonaqları Türkiyədən gəlmiş sənətçilərin ifasında parlaq proqrama tamaşa ediblər. Səhnədə Rüstem Mustafa (skripka), M.Reşat Güner (akkordeon), Zibelhan Dağdelen (vokal), Suzan Şenol Sayın (piano), Simge Keskin (violonçel), Bora Çamoğlu (kontrabas), Ege Tokatlı (gitara), Yavuz Akalın (ney) çıxış ediblər.
Türkiyəli sənətçilər AZƏRTAC-ın müxbiri ilə söhbətində festivalda iştirakla bağlı hisslərini bölüşüblər: "Bakıda özümüzü çox yaxşı hiss edirik. Bu, çox gözəl şəhərdir, burada mehriban insanlar var. Bakı səhnəsində musiqi ifa etmək xüsusi hadisədir. Biz çıxışlardan olduqca həyəcanlıyıq və Bakı Piano Festivalında olmaqdan çox şadıq. Bu fürsətə görə Şahin Növrəsliyə təşəkkür edirik”.
“Altera Ensemble” unikal aranjimanlarla klassik, müasir və dünya musiqisini yeni kontekstdə təqdim edən yenilikçi musiqi qrupudur. Skripka, violonçel, fortepiano, akkordeon, kontrabas, klassik gitara və neyin zəngin çalarları sopranonun valehedici səsi ilə harmonik şəkildə birləşərək dinləyicilərə qeyri-adi musiqi təcrübəsi təqdim edir. Adını transformasiya və innovasiyadan alan “Altera Ensemble” musiqi səyahətinə Piazzollanın ehtiraslı melodiyaları ilə başladı, o vaxtdan repertuarını Barokko və klassik əsərlərin müasir aranjimanlarını, pop və kino musiqisinin mürəkkəb şərhlərini, dünya musiqisini və müasir tanqonu daxil etmək üçün daha da genişləndirdi. Musiqi sərhədlərini aşan və müxtəlif janrları birləşdirən qrup hər bir tamaşada emosional dərinliyi, bədii incəliyi və mədəni müxtəlifliyi vurğulayır.
IV Bakı Piano Festivalı iyunun 28-dək davam edəcək. Paytaxtımızın sakinləri və qonaqlarını müxtəlif janrlı musiqilərdən ibarət geniş konsert proqramı gözləyir. “Bakı Piano Festivalı - 2025” çərçivəsində bədii tədbirlər, sərgilər, ədəbi müsabiqə və cem sessiyaları da nəzərdə tutulub. Festivalın xüsusi qüruru gənc istedadların “Gələcək bizik” konsertidir.
Sonrakı hadisələr barədə daha çox məlumat almaq üçün ain.az saytını izləyin.
