"Maliyyə-bank sistemində yeni rəqəmsal dövrün başlanılmasında həlledici rol oynayacaq rəqəmsal bankların yaradılması diqqət mərkəzində saxlanılmalıdır. Bununla əlaqədar olaraq qanunvericilik islahatlarının aparılması təmin edilməlidir".
Azərbaycan Banklar Assosiasiyasının (ABA) prezisenti Zakir Nuriyev “FİNTEX SAMMİT 2025" sammitində çıxışı zamanı bildirib.
O qeyd edib ki, rəqəmsal bankçılıq qanunvericiliyinin formalaşdırılması fintexlərin maliyyə sistemində fəaliyyətinin daha da genişlənməsində əlverişli zəmin formalaşdıracaqdır.
ABA-nın prezidenti bildirib ki, Mərkəzi Bank tərəfindən istismara veriləcək açıq bankçılığa əsaslanan mərkəzləşdirilmiş infrastruktur açıq maliyyə yanaşmasının daha da dərinləşməsinə və uğurla tətbiqinə imkan verməlidir: "Məhz açıq maliyyə yanaşması maliyyə ekosistemində hörümçək toru prinsipi əsasında qarşılıqlı inteqrasiyalaırn dərinləşməsinə, ödəniş xidməti istifadəçilərinin ehtiyaclarını qarşılayacaq xidmətlərin təqdim edilməsinə təkan verəcəkdir."
Zakir Nuriyev çıxışına belə davam edib: "Hesab edirik ki, rəqəmsal transformasiya dövründə istehlakçı ehtiyaclarını qarşılayacaq məhsul və xidmətlərin təqdim edilməsi, açıq maliyyə yanaşmasının daha uğurlu tətbiqi üçün məhz dövlət qurumlarında toplanılan məlumatlara çıxış təmin edilməlidir. Hazırda bu istiqamətdə aparıcı kommersiya bankları, Mərkəzi Kredit Burosu və Azərbaycan Respubikası Rəqəmsal İnkişaf və Nəqliyyat Nazirliyinin tabeliyində publik hüquqi şəxs olan İnnovasiya və Rəqəmsal İnkişaf Agentliyi nümayəndələrindən ibarət işçi qrupu formalaşdırılmışdır. Burada əsas məqsəd dövlət qurumlarında mövcud olan paylaşıla bilinəcək və maliyyə ekosisteminin üzvlərinə lazm olan məlumatlara effektiv və təhlükəsiz çıxışın təmin edilməsidir".
