Buna uyğun olaraq, 2025-ci il iyulun 8-də rektor A.Eminovun rəhbərlik etdiyi nümayəndə heyəti "Azəralüminium" MMC-nin Gəncə İstehsalat Kompleksini ziyarət edib. 

Ziyarət zamanı istehsalat kompleksində təşkil olunan dəyirmi masa ətrafında universitet və müəssisə rəhbərliyi arasında qarşılıqlı fikir mübadiləsi aparılıb. Görüş zamanı "Azəralüminium” MMC-nin Gəncə İstehsalat Kompleksinin direktoru Cəmil Səfərov MDU ilə əməkdaşlığın əhəmiyyətini vurğulayaraq, bu əməkdaşlığın müasir sənaye tələblərinə cavab verən mühəndis kadrların hazırlanmasında mühüm rol oynayacağını bildirib. O, müəssisənin ixtisaslaşmış kadr potensialına olan ehtiyacını, təcrübə imkanlarını və birgə innovativ layihələrdə iştiraka marağını qeyd edib.

Rektor A.Eminov universitetin əmək bazarının nümayəndələri ilə əməkdaşlıq etməyə, sənayeyə inteqrasiya olunmaq və təhsilalanların praktiki bacarıqlarının inkişafına yönəlik tədris modelinə keçməkdə maraqlı olduqlarını bildirərək istrehsalat müəssisəsi ilə qurulan əməkdaşlığın bu imkanları yaratmaq baxımından önəmli rol oynadığını diqqətə çatdırıb. O, imzalanan memorandumun sadəcə rəsmi sənəd deyil, real əməkdaşlıq planlarının icrası üçün yol xəritəsi olduğunu qeyd edərək, əməkdaşlığın qurulmasında göstərilən dəstəyə görə M.Cavadov başda olmaqla bütün kollektivə minnətdarlığını bildirib. 

Memorandumun məqsədi elmi biliklərlə istehsalat təcrübəsinin sintezini təmin etməklə, ölkənin sənaye potensialına töhfə verə biləcək peşəkar kadrların hazırlanmasını, innovasiya fəaliyyətinin inkişafını və qarşılıqlı resurs mübadiləsini təmin etməkdir. 

Memoranduma əsasən MDU-nun Sənaye mühəndisliyi, Energetika mühəndisliyi, Elektrik və elektronika mühəndisliyi, Həyat fəaliyyətinin təhlükəsizliyi mühəndisliyi ixtisasları, eləcə də Elektroenergetika üzrə ixtisaslaşmasının tədris proqramları və sillabusları təkmilləşdiriləcək. Həmin ixtisaslarda təhsil alan tələbələrin istehsalat təcrübəsi və dərslərin praktiki hissəsi "Azəralüminium” MMC-nin Gəncə İstehsalat Müəssisəsində keçiriləcək. Magistrantların dissertasiya mövzuları müəssisənin real istehsalat problemlərinə həsr olunacaq və onların elmi rəhbərləri ilə yanaşı, müəssisədən də bir rəhbər təyin ediləcək. Müvafiq istiqamətlər üzrə magistratura səviyyəsinə yüksək nəticələrlə qəbul olunan məzunlar müəssisə tərəfindən işlə təmin olunacaqlar.

Tərəflər birgə əməkdaşlıq çərçivəsində təhsil və təcrübə mübadiləsi, elmi-tədqiqat və innovasiya fəaliyyəti, insan resurslarının inkişafı, sosial və ictimai təşəbbüslərin həyata keçirilməsi istiqamətlərində fəaliyyətləri icra edəcəklər. Bu əməkdaşlıq universitetin akademik potensialının istehsalatla sinxronlaşdırılması, tələbələrin bilik və bacarıqlarının artırılmasına, eləcə də müəssisənin kadr ehtiyaclarının daha səmərəli şəkildə ödənilməsinə töhfə verəcək.

Ziyarət zamanı nümayəndə heyəti müəssisənin maddi-texniki bazası və müasir istehsalat infrastrukturu və tədris mərkəzi ilə yaxından tanış olub. 

Qeyd edək ki, MDU ilə "Azəralüminium” MMC arasında imzalanan əməkdaşlıq Memorandumu ali təhsil sistemində tətbiqyönümlü yanaşmanın gücləndirilməsi və sənaye ilə real əlaqələrin qurulması baxımından önəmli nümunədir.