ABŞ Federal Ehtiyat Sistemi (FES, Mərkəzi Bankın funksiyalarını yerinə yetirən qurum - red.) 29-30 iyul tarixlərində keçirilən iki günlük iclasın nəticəsinə görə uçot dərəcəsini illik 4,25-4,5% səviyyəsində saxlayıb.
"Report" xəbər verir ki, bu barədə tənzimləyicinin mətbuata açıqlamasında bildirilir.
Beləliklə, tənzimləyici ardıcıl beşinci dəfədir faiz dəcələrini dəyişdirmir.
"Reuters" agentliyinin sorğusunda iştirak edən ekspertlərin əksəriyyəti qeyd edir ki, intriqa qalmaqdadır: FES artan siyasi müdaxilə fonunda müstəqil qala biləcəkmi. Agentlik yazır ki, Tramp tərəfindən bu vəzifələrə təyin edilmiş FES İdarə Heyətinin üzvləri Kris Uoller və Mişel Bouman son zamanlarda iyul iclasında faiz dərəcələrinin azaldılmasını dəstəklədiklərini bildiriblər.
"Məni FES-in müstəqilliyi məsələsi narahat edir və bunun əsas səbəbi Bouman və Uollerin son davranışlarıdır. Onların konsensusdan fərqləndikləri çox aydın görünür", - "Rabobank"ın ABŞ üzrə baş strateqi Filip Marey bildirir.
FES-in faiz dərəcəsi ilə bağlı növbəti iclası 16-17 sentyabr tarixlərinə planlaşdırılıb.
"Reuters" başqa bir sorğusunda iştirak edən iqtisadçıların yarıdan bir qədər çoxu (105-dən 56-sı) sentyabrda faiz dərəcələrinin azaldılmasını proqnozlaşdırır.
