“Qarabağ”ın müdafiəçisi Bəhlul Mustafazadənin QOL.az saytına müsahibəsi
- “Şelburn”u ikinci oyunda da məğlub etməklə Çempionlar Liqasında üçüncü təsnifat mərhələsinə yüksəldiniz. 1:0 hesablı qələbəni necə şərh edərdiniz?
- Rəqib fiziki cəhətdən kifayət qədər güclü komanda idi. Bununla belə, öz oyunumuzu göstərdik. Gərgin qarşılaşma alındı. Minimal hesabla da olsa, qalib gəldik.
- Sanki “Qarabağ” ağır görünürdü...
- İstinin də bir qədər təsiri var idi. Həm də unutmayaq ki, bu, mövsümdə yalnız ikinci rəsmi oyunumuz idi. İnanıram ki, növbəti matçlarda daha yaxşı təsir bağışlayacağıq.
- Düşünmək olar ki, ilk matçdakı 3:0 hesablı qələbə cavab oyununda “Qarabağ”a rahatçılıq vermişdi?
- Bəlkə hesabın da təsiri ola bilər. Bununla belə, arxayınlaşmamışdıq. Rəqib geridönüş etməyə çalışırdı. Hiss olunurdu ki, ikinci matça yaxşı hazırlaşıblar.
- Qazonun vəziyyəti heç də yaxşı deyildi. İstilərin hələ bir müddət də davam edəcəyini nəzərə alsaq, bu amil texnikalı oyuna üstünlük verən “Qarabağ”a növbəti ev matçlarında problem yarada bilər?
- Haqlısınız, qazonun vəziyyəti əvvəlki dövrlə müqayisədə bir qədər pis idi. Lakin bu məsələdə edə biləcəyimiz bir şey yoxdur. Qazon ideal durumda olmasa da, əlimizdən gələni etməliyik.
- Çempionlar Liqasında üçüncü təsnifat mərhələsinə yüksəlməklə Konfrans Liqasının liqa mərhələsinə vəsiqəni təmin etdiniz. Lakin yəqin ki, qarşıya qoyulan hədəf bu deyil. Razısınız?
- Əlbəttə, hədəf bu deyil. Maksimum məqsədimiz Çempionlar Liqasının liqa mərhələsinə vəsiqə qazanmaqdır. Bunu çox istəyirik. Gələn oyunlarda da əlimizdən gələni edəcəyik ki, hədəfimizə çataq.
- Hücumçu çatışmazlığını nəzərə alsaq, hazırkı heyətlə bu, nə dərəcədə realdır?
- Komandada yaxşı futbolçular cəmləşib. Potensialımız var. Düşünürəm ki, hər kəs öz üzərinə düşəni yüz faiz yerinə yetirsə, bu heyətlə də Çempionlar Liqasının liqa mərhələsinə vəsiqə qazana bilərik.
