BAKI, TurkicWorld
Türkiyə Silahlı Qüvvələrinin yeni Baş Qərargah rəisi general Səlcuq Bayraktaroğlu 9 mart 1961-ci ildə Artvin vilayətinin Yusufeli rayonunun Kılıçkaya qəsəbəsində dünyaya gəlib.
Hərbi təhsilinə 1977-ci ildə Kuleli Hərbi Liseyində başlayan Bayraktaroğlu, 1981-ci ildə Hərbi Akademiyanı, bir il sonra isə Rabitə Məktəbini və Təlim Mərkəzini bitirib. 1993-cü ildə Qərargah zabiti ixtisasını qazanaraq Hərbi Akademiyanı, 1997-ci ildə isə Silahlı Qüvvələr Akademiyasını müvəffəqiyyətlə başa vurub.
Peşəkar hərbi karyerası ərzində müxtəlif vəzifələrdə çalışan Bayraktaroğlu 2000-ci ildə polkovnik rütbəsinə yüksəlib. Uzun illər Baş Qərargahın 2-ci Kəşfiyyatın Təhlili və Qiymətləndirilməsi İdarəsində fəaliyyət göstərərək Əsas Təhlil Şöbəsinə rəhbərlik edib.
2009-cu ildə briqada generalı rütbəsini alan Bayraktaroğlu, əvvəlcə 9-cu Komando Briqadasına komandanlıq edib, daha sonra isə Quru Qoşunlarının Maddi-Texniki Təchizat Komandanlığında Sursat Komandiri kimi fəaliyyət göstərib. Bu dövrdə — 2012-ci il yanvarın 2-də Kırıkkaledəki Sursat Müəssisəsində baş verən partlayış nəticəsində dörd işçinin həyatını itirməsi diqqət çəkmişdi.
2013-cü ildə general-mayor, 2016-cı ildə isə general-leytenant rütbəsinə yüksələn Bayraktaroğlu müxtəlif kritik vəzifələrdə – o cümlədən MEBS və Kiber Müdafiə Komandanlığı, 3-cü Ordunun Baş Qərargah Rəisliyi və Baş Qərargah Rəisinin müavini vəzifələrində çalışıb.
2020-ci ildə Metin Gürakın Liviyaya göndərilməsi ilə əlaqədar olaraq Baş Qərargah rəisinin müavini vəzifəsini icra etməyə başlayan Bayraktaroğlu, 2021-ci ilin avqustunda tam şəkildə bu vəzifəyə təyin olunub və general rütbəsinə layiq görülüb. Elə həmin il, 24 dekabrda, Müdafiə naziri Hulusi Akar tərəfindən “Fərqli Xidmət” medalı ilə təltif edilib.
2023-cü ilin avqustundan Quru Qoşunlarının Komandanı vəzifəsini icra edən Bayraktaroğlu, 5 avqust 2025-ci il tarixində Ali Hərbi Şuranın qərarı ilə Türkiyə Silahlı Qüvvələrinin Baş Qərargah rəisi təyin olunub. Bu vəzifəyə o, istefaya göndərilmiş general Metin Gürakın yerinə gətirilib.
Səlcuq Bayraktaroğlu ailəlidir, həyat yoldaşı Hürriyət Bayraktaroğludur və iki övladı var.
