ABŞ-ın Cənubi Qafqazdakı iqtisadi layihələri Amerikanın regionda təsirini gücləndirmək və genişləndirmək məqsədi güdə bilər.
NOCOMMENT.az bildirir ki, bunu İran prezidenti Məsud Pezeşkian Ermənistanın baş naziri Nikol Paşinyanla telefon danışığı zamanı deyib.
“İnvestisiya layihələri və dinc bəyanatlar adı altında Cənubi Qafqazda öz hegemonluğunu bərqərar etmək məqsədini güdə biləcək Amerika tərəfinin gələcək addımlarını xüsusi ehtiyatla izləmək lazımdır”, – deyə Pezeşkian dövlət başçısının Teleqram kanalında yazıb.
İran prezidentinin sözlərinə görə, Ermənistan Azərbaycanın əsas hissəsini Naxçıvandakı anklavı ilə birləşdirəcək nəqliyyat dəhlizi layihəsinin həyata keçirilməsində üçüncü ölkələrin silahlı qüvvələrinin iştirakına imkan verməməlidir.
İslam Respublikasının Xarici İşlər Nazirliyinin rəhbəri Abbas Əraqçi bir müddət əvvəl Ermənistan və Azərbaycanın ekstraterritorial Zəngəzur dəhlizinin yaradılması məsələsini gündəmdən çıxardığını bildirib. Diplomat vurğulayıb ki, İranın narahatlığı hazırda Cənubi Qafqazda xarici təsirlərin genişlənməsi ilə bağlıdır və Tehran bu mövzuda İrəvanla məsləhətləşmələr aparır.
Avqustun 8-də Vaşinqtonda ABŞ prezidenti Donald Trampla üçtərəfli görüşdən sonra Azərbaycan prezidenti İlham Əliyev və Paşinyan Bakı ilə İrəvan arasında sülh yolu ilə nizamlanma və iki Zaqafqaziya respublikası arasında nəqliyyat dəhlizinin yaradılması haqqında birgə bəyannamə imzalayıblar. Nəqliyyat dəhlizi “Beynəlxalq Sülh və Rifah üçün Tramp Marşrutu” adlanacaq. Ermənistan ABŞ-a bu dəhlizi idarə etmək hüququnu 99 il müddətinə verib.
