"Putin könüllü şəkildə təcavüzdən əl çəkməyəcək, biz isə qətlləri dayandırmalıyıq..."
Bu gün Ukrayna prezidenti Vladimir Zelenski Vaşinqtonda ABŞ prezidenti Donald Tramp ilə görüşəcək. Danışıqların əsas mövzusu artıq üç ildən çox davam edən müharibəyə son qoymaqdır.
Moderator.az xəbər verir ki, bu barədə Ukrayna mətbuatı yazıb.
Vaşinqtonda tarixi gün
Avropanın aparıcı liderləri də Ağ Evdədir: Ursula fon der Lyayen, Mark Rütte, Kir Starmer, Corca Meloni, həmçinin digər yüksək vəzifəli şəxslər. Bu, Trampın prezidentliyi dövründə Avropadan ən böyük diplomatik təmsilçilik hesab olunur.
Protokol detalları - qalstuk müzakirəsi
Mətbuata sızan məlumatlara görə, Ağ Ev Zelenskidən bu dəfə görüşə kostyum və qalstukla gəlməyi xahiş edib. Səbəb - martdakı əvvəlki sammitdə onun hərbi üslubdakı geyimi diplomatik qalmaqala səbəb olmuşdu. Lakin Ukrayna liderinin bu dəfə də qalstuksuz gələcəyi gözlənilir.
Moskvanın sərt mövqeyi
Rusiya XİN bəyan edib ki, NATO qüvvələrinin Ukrayna ərazisində yerləşdirilməsi Moskva üçün qəbuledilməzdir və "təxmin edilməyən nəticələr" doğura bilər.
Zelenskinin mesajı
Trampla görüşdən öncə Zelenski sosial şəbəkədə yazıb: "Bizim məqsədimiz Ukrayna və bütün Avropa üçün etibarlı və davamlı sülhdür. Putin könüllü şəkildə təcavüzdən əl çəkməyəcək, biz isə qətlləri dayandırmalıyıq. Ukrayna real atəşkəsə və yeni təhlükəsizlik arxitekturasına hazırdır".
Trampın ritorikası
Tramp görüş ərəfəsində bəyan edib ki, müharibəni qısa zamanda dayandıra bilər: "Zelenski istəsə, bunu dərhal edə bilər. Krım məsələsi bağlanıb - onu Obama 12 il əvvəl döyüşsüz təhvil verib. Ukraynanın NATO-ya üzvlüyündən də söhbət gedə bilməz. Mən nə etdiyimi yaxşı bilirəm və tənqidçilərin məsləhətlərinə ehtiyacım yoxdur". O, həmçinin əlavə edib ki, hətta Rusiya kapitulyasiya etsə belə, "saxta media bunu onun uğursuzluğu kimi təqdim edəcək".
Görüşün formatı
Əvvəlcə Tramp və Zelenski ikitərəfli danışıqlar aparacaqlar, daha sonra isə ABŞ prezidenti Avropa liderləri ilə görüşəcək. ABŞ rəsmilərinə görə, təhlükəsizlik zəmanətlərini əsasən Avropa maliyyələşdirəcək, Amerika isə kəşfiyyat paylaşımı, PUA uçuşları, logistika və silah təchizatı kimi dolayı dəstək göstərə bilər.
Əsas sual
Analitiklər yazır ki, Zelenskiyə Vaşinqtonda "acı həqiqət" - Donbas və Krımın güzəşti qarşılığında təhlükəsizlik zəmanətləri təqdim oluna bilər. Lakin Ukrayna Konstitusiyası ərazi güzəştini qadağan edir və Zelenski də dəfələrlə bildirib ki, "torpaq satılmır və təhvil verilmir".
Növbəti addım
"Sky News"-un məlumatına görə, yaxın günlərdə Tramp, Zelenski və Putin arasında Avropada üçtərəfli görüş mümkündür. İclas üçün Roma və ya Cenevrə variantları müzakirə olunur. Vaşinqtondakı danışıqların nəticəsi isə bu həftə beynəlxalq gündəliyin əsas mövzusu olacaq.
