Ulusal.az xəbər verir ki, sosial mediada yayılan görüntülər İran İslam Respublikasının banisi Ruhullah Xomeyninin nəticəsi Nəimə Tahirinin Kanada və ABŞ-də dəbdəbəli həyat sürdüyünü üzə çıxarıb. Kadrlarda onun bahalı evlərdə, lüks tədbirlərdə və yüksək səviyyəli həyat standartları içində yaşaması əksini tapıb.
Bu məlumatlar İran daxilində geniş rezonans doğurub. Ölkə iqtisadiyyatı ağır sanksiyalar, inflyasiya və işsizlik problemi ilə üz-üzə qaldığı bir vaxtda, milyonlarla sadə vətəndaş gündəlik dolanışıq üçün mübarizə aparır. Xüsusilə də ərzaq və mənzil qiymətlərinin artması fonunda sıravi ailələrin yaşayış səviyyəsi ciddi şəkildə aşağı düşüb.
İran inqilabından sonra Xomeyni ailəsi ölkədə “sadəlik, təqva və təmkin” anlayışları ilə simvolizə olunub. Rəsmi təbliğat uzun illər boyu ailə üzvlərinin dünyəvi lüksdən uzaq durduğunu, dini dəyərlərə sadiq qaldığını vurğulayıb. Lakin xaricdə çəkilmiş görüntülər bu imici ciddi şəkildə sarsıdır. İranlı sosial şəbəkə istifadəçiləri bunu “ikiüzlülük” və “daxili təbliğatın iflası” kimi qiymətləndirirlər.
İranda yaşayan ata- anası
Maraqlıdır ki, Kanada Statistika İdarəsinin 2023-cü ilə dair məlumatlarına görə, ölkədə ailələrin orta xalis sərvəti 519,700 dollar təşkil edib. Ən yüksək göstərici 65 yaşdan yuxarı ailələrdə (1,1 milyon dollar), uşaqlı ailələrdə 645,900 dollar, tək valideynli ailələrdə isə 211,200 dollar olub. Bu rəqəmlər göstərir ki, Qərbdə orta sinif ailələrin belə müəyyən maliyyə imkanları var. Buna baxmayaraq, siyasi elitaya mənsub şəxslərin yaşadığı dəbdəbə çoxları üçün “həddən artıq imtiyaz” təsiri bağışlayır.
İranlı müşahidəçilər hesab edirlər ki, siyasi hakimiyyətin ideoloji dayağı olan Xomeyni nəsli ölkə daxilində təbliğ etdiyi “təvazökar həyat” prinsiplərinə zidd davranır. Bu isə sadə vətəndaşların sosial ədalətə olan inamını daha da zəiflədir. Sosial mediada yayılan şərhlərdə “ədalətsizlik”, “imtiyazlı həyat” və “ikili standart” ifadələri xüsusi yer tutur.
Nəimə Tahirinin Qərbdəki lüks həyatı ətrafında yaranan müzakirələr İran cəmiyyətində daha geniş bir problemi üzə çıxarır: ölkə daxilində sosial-iqtisadi böhran dərinləşdikcə, hakimiyyət elitasının yaşam tərzi ilə xalqın reallığı arasında uçurum daha aydın görünür. Bu uçurum isə təkcə iqtisadi yox, həm də ideoloji böhranı gücləndirir.
