Qazaxıstanın milli neft şirkəti "KazMunayQaz" (KMQ), Azərbaycan Dövlət Neft Şirkəti (SOCAR) və Rusiyanın "Tatneft" şirkəti Qazaxıstanda texnogen qəza halları üzrə birgə təlimlər həyata keçirir.
BAKU.WS xəbər verir ki, Qazaxıstan mətbuatının KMQ-yə istinadən verdiyi məlumata görə, təlimlər Qərbi Qazaxıstandakı "Şərqi Makat" yatağında təşkil olunub.
Tədbirin əsas məqsədi iştirakçı şirkətlər arasında qarşılıqlı əməkdaşlığı gücləndirmək və sənaye təhlükəsizliyi standartlarını yüksəltməkdir.
Bildirilir ki, bu təlimlər Azərbaycan, Qazaxıstan və Rusiyanın neft şirkətləri arasında rəqəmsal texnologiyalar və sənaye təhlükəsizliyi sahəsində əməkdaşlıq barədə Memorandum çərçivəsində keçirilir.
Qeyd edək ki, 28 may 2025-ci il tarixində SOCAR, "KazMunayQaz", "Tatneft" və "Uzbekneftegaz" şirkətləri dekarbonizasiya və davamlı inkişaf təşəbbüsləri üzrə əməkdaşlıq sazişi imzalayıb. Bu saziş çərçivəsində qlobal çağırışlara birgə cavab vermək məqsədilə konsorsium yaradılıb.
