Bakı Şəhər Ticarət və Xidmət Departamentinin Yeraltı Keçidlər üzrə Ticarət Birliyində operativ vergi nəzarəti həyata keçirilib.
Bakıvaxtı.az xəbər verir ki, Qaynarinfo-nun əldə etdiyi məlumata görə, yoxlama zamanı ciddi pozuntular aşkarlanıb.
Təkcə bu ilin ötən dövründə adıçəkilən birlik barəsində 15 dəfə maliyyə sanksiyası tətbiq olunub. Qeyd edək ki, birlik əsasən Bakıda fəaliyyət göstərən "Kiosk Press"lərə nəzarət edir.
İqtisadiyyat Nazirliyi yanında Dövlət Vergi Xidmətinin Bakı şəhəri Lokal Gəlirlər Baş İdarəsi tərəfindən aparılan operativ vergi nəzarəti zamanı əhali ilə pul hesablaşmalarının aparılması qaydalarının pozulması faktları qeydə alınıb. Nəticədə, Yeraltı Keçidlər üzrə Ticarət Birliyi 14 dəfə 3000 manat, 1 dəfə isə 1000 manat olmaqla ümumilikdə 43 min manat cərimələnib.
Məlumat üçün bildirək ki, Bakı Şəhər İcra Hakimiyyətinin strukturuna daxil olan bu birliyin direktoru Elşad Əli oğlu Səfərovdur. O, 2021-ci ilin sentyabrında Bakı Şəhər İcra Hakimiyyətinin başçısı Eldar Əzizovun əmri ilə direktor təyin edilib. Elşad Səfərov bundan əvvəl Dövlət Vergi Xidmətində müxtəlif vəzifələrdə çalışıb.
