Azərbaycan–Rusiya münasibətləri son illərdə müxtəlif gərginlik məqamlarından keçib. Bu gərginliyin kökündə həm tarixi hadisələr, həm də son dövrün siyasi və hərbi səhvləri dayanır. Prezident İlham Əliyevin “Əl-Ərəbiya”ya verdiyi müsahibə bir daha göstərdi ki, Bakı Moskva ilə münasibətlərin bərpasında qarşılıqlı hörmət və ədalətli yanaşmanı əsas şərt kimi görür. Xüsusilə AZAL təyyarəsinin vurulması ilə bağlı məsuliyyətin qəbul edilməməsi və təzminatın ödənilməməsi məsələsi Azərbaycanın haqlı etirazının mərkəzindədir. Əks tərəfdən isə Azərbaycan öz üzərinə düşən məsuliyyətləri vaxtında yerinə yetirdiyini, nümunə olaraq 2020-ci ildə Rusiyaya məxsus hərbi helikopterin vurulmasından sonra üzr və təzminat ödənilməsini göstərir. Prezident Əliyevin açıqlamaları Moskvanın birtərəfli yanaşmalarına qarşı siyasi iradənin nümayişi kimi qiymətləndirilə bilər.
Məsələ ilə bağlı Milli Məclisin deputatı Azər Badamov Editor.az-a bildirib ki, Prezident İlham Əliyev “Əl-Ərəbiya” televiziya kanalına verdiyi müsahibədə Azərbaycan–Rusiya münasibətlərində yaranmış gərginliyin səbəblərinin aradan qaldırılması üçün qarşılıqlı hörmətin vacibliyini vurğulayıb:
“Dövlət başçısı bildirdi ki, iki ölkə arasında münasibətlərin gərginləşməsinin əsas başlanğıcı Rusiyanın hava hücum qüvvələrinin AZAL-a məxsus təyyarəyə iki dəfə atəş açması və nəticədə çoxsaylı insan itkisinə səbəb olan faciəyə görə üzr istəməməsi və təzminat ödəməməsidir.
Prezident Əliyev müqayisə üçün xatırlatdı ki, 2020-ci il 9 noyabr tarixində Rusiyaya məxsus hərbi helikopter səhvən vurulduqda, o, dərhal prezident Vladimir Putinə zəng edərək üzr istəmiş və müvafiq təzminatlar ödənmişdir. Azərbaycan tərəfi bu addımı atdığı halda, Rusiyanın eyni yanaşmanı nümayiş etdirməməsi haqlı olaraq narazılıq doğurur.
Dövlət başçısı həmçinin qeyd etdi ki, Ekaterinburqda baş vermiş hadisələrdən başlayaraq azərbaycanlılara qarşı atılan ədalətsiz addımlar gərginliyin azaldılmasına deyil, əksinə, daha da dərinləşməsinə xidmət edir. Azərbaycan müstəqil ölkə olaraq bütün qonşularla qarşılıqlı hörmət və fayda əsasında əməkdaşlığın tərəfdarıdır. Təzyiq ritorikası isə münasibətləri sağlam məcraya qaytarmır”.
Millət vəkilinin sözlərinə görə, Prezident Əliyevin müsahibəsinə Kreml mediasının qərəzli yanaşması Rusiyanın hələ də üstünlük və təzyiq mövqeyindən əl çəkmədiyini göstərir:
“Bu baxımdan Azərbaycan–Rusiya münasibətlərində gərginliyin yumşaldılması istiqamətində real addımlar müşahidə olunmur. Münasibətlərin normallaşdırılması üçün dövlət başçıları səviyyəsində görüşün keçirilməsi, problemlərin açıq müzakirəsi və Moskvanın ədalətsiz yanaşmalardan geri çəkilməsi vacib şərt kimi qalır”.
//Gülnarə Abasova, Editor.az
