Çinin “Pop Mart International Group” şirkətinin qurucusu və rəhbəri Vanq Ninq sərvətini kəskin şəkildə artırıb.
Yeniavaz.com “Bloomberg”ə istinadən xəbər verir ki, “Pop Mart” aksiyalarının bahalaşması nəticəsində onun sərvəti bu ilin əvvəlindən ötən 8 ay ərzində 19 milyard dollar artaraq 26,6 milyard dollara çatıb.
Bu artımdan sonra Vanq Ninq dünyanın ən zəngin insanları siyahısında ilk 100-lüyə daxil olub.
Məlumat üçün bildirək ki, bu artımın əsas səbəbi isə şirkətin ən çox satılan məhsullarından biri – “Labubu” oyuncağıdır.
Qeyd edək ki, “Pop Mart International Group” 2010-cu ildə qurulub və hazırda dünyanın ən iri oyuncaq istehsalçılarından biridir. Şirkətin əsas uğuru məhdud sayda buraxılan kolleksiya fiqurları və onların ətrafında yaradılan populyar mədəniyyət dalğasıdır.
“Labubu” ilk dəfə 2014-cü ildə Honq-Konqlu illüstrator və oyuncaqlar dizayneri Kasinq Lunq tərəfindən yaradılıb. “Labubu” “Bədheybətlər” (“The Monsters”) adlı kolleksiyanın əsas qəhrəmanıdır. Böyük qulaqları, iti dişləri və şən, bir az da qorxunc görünüşü ilə tanınır.

“Labubu” 2019-cu ildən “Pop Mart” tərəfindən oyuncağa çevrilərək satışa çıxarılıb. Qısa müddətdə “Labubu” Çində, Yaponiyada və Qərb ölkələrində trend oyuncağa çevrilib.
Oyuncaqlar məhdud sayda buraxıldığı üçün kolleksiyaçılar arasında böyük tələb var. “TikTok”, “Instagram” və digər platformalarda “Labubu” ilə çəkilən videolar trendə çevrilib. Onun dizaynı həm uşaqlara əyləncəli gəlir, həm də böyüklər tərəfindən kolleksiya dəyəri daşıyır.
Hazırda “Labubu”nun nadir versiyaları bir neçə min dollara qədər satılır. Bu isə “Pop Mart” şirkətinin gəlirlərini rekord həddə çatdırıb.

Murad Məmmədov