“Ermənistanın öz ərazisindəki suverenliyi və yurisdiksiyası milli, irqi, dini və vətəndaşlığına görə heç bir bölgü olmadan hər kəsə şamil edilir”.
Bunu Ermənistanın Baş naziri Nikol Paşinyan sentyabrın 10-da Milli Assambleyanın iclasında “Ermənistan” müxalifət blokundan olan deputat Aqnessa Xamoyanın sualını cavablandırarkən deyib.
Millət vəkili xüsusilə də kommunikasiyaların bağlanması halında Azərbaycan vətəndaşlarının Ermənistana girişinin necə tənzimlənəcəyini soruşub.
“Məsələn, onların pasportları yoxlanılacaqmı, məsələn, Ermənistan Respublikası ərazisində cinayət törətsələr, saxlanılıb mühakimə olunacaqlarmı?”,- Xamoyan soruşub.
Paşinyan cavab verib ki, Ermənistan Respublikasının yurisdiksiyası hamıya eyni dərəcədə şamil edilən dövlət prinsipidir.
Eyni zamanda, Baş nazirin qeyd etdiyi kimi, Ermənistan müasir texnologiyalar və mexanizmləri mənimsəməyə çalışır:
“Xüsusilə, sərhədləri keçmək məsələsində buna can atırıq. Ölkələrdə adi rejimdə oxuma cihazlarından istifadə etməklə pasport nəzarəti təmin olunur. Yəni insanların iştirakı olmadan. Sərhədçilər yalnız şübhəli şəxslər aşkar edildikdə müdaxilə edirlər", - hökumət başçısı izah edib.
Baş nazirin sözlərinə görə, hökumət bu cür texnologiyalardan ölkənin bütün sərhədlərində - Gürcüstan, İran, Türkiyə və Azərbaycanla istifadə etmək niyyətindədir. Onlardan hava limanlarında da istifadə olunacaq.
