Abşeron Rayon Məhkəməsində əmlakı qəsdən məhv etmə və ya zədələmədə təqsirləndirilən Zəlimxan Qubadovun (adı, soyadı şərtidir) cinayət işi üzrə məhkəmə istintaqı yekunlaşıb.
Bizim.Media xəbər verir ki, hakim Abusət Qasımovun sədrliyi ilə keçirilən prosesdə hökm oxunub.
Məhkəmənin hökmü ilə o, 3 il 8 ay müddətinə azadlıqdan məhrum edilib.
İttihama görə, Zəlimxan Qubadov 24 dekabr 2024-cü il axşam saatlarında, orta dərəcəli sərxoş vəziyyətdə olarkən keçmiş həyat yoldaşı, zərərçəkmiş Kəmalə Qubadovaya (adı, soyadı şərtidir) məxsus Abşeron rayonu, Aşağı Güzdək qəsəbəsində yerləşən fərdi yaşayış evinə gəlib. Orada mübahisə yarandıqdan sonra zərərçəkmiş övladları ilə birlikdə evi tərk edib.
Təqsirləndirilən şəxs isə evdə tək qaldıqdan sonra qəsdən əmlaka ziyan vurmaq məqsədilə yataq otağına keçərək əlində olan alışqanla yanğın törədib.
Hadisə nəticəsində ümumilikdə 28 000 manat dəyərində məişət və ev əşyaları məhv olub. Yanan əşyalar arasında 4 min manatlıq yataq mebeli dəsti, 4500 manatlıq mətbəx mebeli dəsti, 7 min manatlıq qonaq otağı dəsti, “Toshiba” markalı televizor, “Samsung” markalı məişət texnikası, mebel, pərdə dəstləri, çilçıraqlar, yorğan-döşək və digər əşyalar olub.
Bundan əlavə, yanğın evin konstruksiyasına da ziyan vurub. Ümumilikdə zərərçəkmişə 50 000 manat maddi ziyan dəyib.
Hadisədən sonra Zəlimxan Qubadov saxlanılıb və barəsində həbs qətimkan tədbiri seçilib. (Pravda.az)
Bizim.Media
