Bakı, 22 sentyabr, AZƏRTAC
Azərbaycan Respublikası Prezidentinin 2023-cü il 8 iyul tarixli Sərəncamına uyğun olaraq Xarici İşlər Nazirliyi və Elm və Təhsil Nazirliyi tərəfindən birgə icra edilən “Heydər Əliyev adına Beynəlxalq Təhsil Qrantı” proqramına 2025-2026-cı tədris ili üzrə namizədlərin seçimi prosesi başa çatıb. 51 ölkə üzrə 100 nəfər təhsil qrantına layiq görülüb.
BDU-dan AZƏRTAC-a bildirilib ki, həmin tələbələrdən 14-ü təhsilini BDU-da davam etdirəcək. Onlardan 3-ü Fələstin,1-i Cibuti, 5-i İraq, 1-i Keniya, 1-i Pakistan, 2-si Qazaxıstan,1- i Saint Kitts və Nevisdəndir.
Qeyd edək ki, bu proqrama əsasən, İslam Əməkdaşlıq Təşkilatı və Qoşulmama Hərəkatına üzv ölkələr, İnkişaf etməkdə olan Kiçik Ada Dövlətləri qrupuna daxil olan ölkələr və xalqımızla etnik, tarixi və mədəni bağlara malik xalqların və milli azlıqların yaşadığı ölkələrin vətəndaşlarının 5 il ərzində Azərbaycan Respublikasının ali təhsil müəssisələrində müxtəlif təhsil səviyyələri üzrə təhsil almaları nəzərdə tutulub.
