Azərbaycan xalqı hər il 27 sentyabr tarixini böyük ehtiramla yad edir. Bu gün təkcə hüzn günü deyil, həm də milli qürur və qəhrəmanlıq günüdür. Çünki 2020-ci ilin məhz həmin günündə Ermənistan silahlı qüvvələrinin növbəti təxribatına cavab olaraq başlayan 44 günlük Vətən müharibəsi xalqımızın şanlı Zəfəri ilə nəticələndi. Bu gün şəhidlərimizin müqəddəs xatirəsinə ehtiram günüdür.
27 sentyabr xalqımızın yaddaşında Vətən uğrunda canından keçənlərin, igidlərin xatirəsinin yaşadığı gün kimi qalacaq. Bu tarix Azərbaycan dövlətçiliyinin gücünü və xalqımızın əbədiyyətə uzanan qəhrəmanlıq yolunu simvollaşdırır. 44 günlük Vətən müharibəsi milli birlik və iradənin parlaq nümunəsi oldu.Bu gün biz şəhidlərimizin qanı bahasına qazandığımız azadlığın dəyərini bir daha anlayırıq. Onların fədakarlığı hər bir Azərbaycan vətəndaşının qəlbində əbədi yaşayır.
Anım Günü – bu fədakarlığın, qəhrəmanlığın və vətən sevgisinin ən uca ifadəsidir.Müzəffər Ali Baş Komandan, Prezident cənab İlham Əliyevin rəhbərliyi ilə Azərbaycan Ordusu işğal altındakı torpaqlarımızı azad etdi. Bu tarixi Zəfər yalnız ordumuzun gücü deyil, həm də xalqımızın birliyinin və iradəsinin zəfəridir.27 Sentyabr Anım Günü gənc nəsillərə vətənpərvərlik, milli həmrəylik və fədakarlıq dərsi verir. Bu gün biz gələcək üçün müqəddəs borcumuzu yerinə yetiririk – şəhidlərimizin xatirəsini uca tutmaq, torpaqlarımızın azadlığını qorumaq və gələcəkdə daha güclü Azərbaycan yaratmaq.
Azad edilmiş torpaqlarımızda ucalan üçrəngli bayraq şəhidlərimizin qanı bahasına qazanılmış zəfərin əbədi simvoludur. Bu bayraq hər bir azərbaycanlının qürur mənbəyidir və milli birliyimizin möhkəm təməlinin göstəricisidir.
Anar Məmmədov,
YAP Gədəbəy rayon təşkilatının əməkdaşı
