Azpolitika.az portalından əldə olunan məlumata əsasən, ain.az xəbər verir.
ABŞ Konqresində cinsi cinayətlərə görə məhkum edilmiş və 2019-cu ildə həbsdə intihar edən maliyyəçi Ceffri Epşteynin fəaliyyətinə dair yeni sənədlər açıqlanıb.
“AzPolitika” Qərb mediasına istinadən xəbər verir ki, Nümayəndələr Palatasının Nəzarət Komitəsindəki demokrat üzvlər cümə günü onun 2014–2019-cu illərə aid şəxsi gündəliklərindən qeydləri ictimaiyyətə təqdim ediblər.
Kimlərin adları keçir?
Sənədlərə əsasən, Epşteyn 2014-cü ildə ABŞ-ın nüfuzlu iş adamları – İlon Mask və Peter Til, həmçinin mühafizəkar şərhçi və sabiq prezident Donald Trampın müşaviri olmuş Stiv Bennonla görüşlər planlaşdırıb. Gündəliyin başqa bir hissəsində isə Böyük Britaniya şahzadəsi Endryunun 2000-ci ildə Epşteynin şəxsi təyyarəsində uçduğu qeyd olunur. Bu materiallar Epşteynin varisləri tərəfindən Konqresə təqdim edilib.
Qeydlərdə adı çəkilən şəxslərə qarşı birbaşa ittiham irəli sürülmür. Yazılanlar yalnız görüşlərin planlaşdırıldığını göstərir, lakin onların baş tutduğunu təsdiqləmir.
İlon Mask sosial şəbəkə “X”də (keçmiş Twitter) məlumatı “tam yalan” adlandırıb. Peter Til, Stiv Bennon və şahzadə Endryu isə məsələ ilə bağlı heç bir açıqlama verməyiblər.
Demokrat konqresmenlər bildiriblər ki, sənədlər Epşteynin “dünyanın ən zəngin və nüfuzlu insanlarından bəziləri ilə əlaqələrinin” təsdiqi kimi qiymətləndirilə bilər. Onlar ABŞ Ədliyyə Nazirliyini maliyyəçinin cinayət fəaliyyəti ilə bağlı bütün materialları açıqlamağa çağırıblar.
Komitənin nümayəndəsi Sara Gerrero bəyan edib ki, Epşteynin cinayətlərinə hər hansı formada aidiyyəti ola biləcək bütün şəxslərin müəyyənləşdirilməsi istiqamətində işlər davam etdiriləcək.
ABŞ Federal Təhqiqatlar Bürosu (FBI) isə daha əvvəl bəyan etmişdi ki, Epşteynin qadın və yetkinlik yaşına çatmayan qızların cinsi istismarı ilə məşğul olarkən kiminləsə maraq naminə fəaliyyət göstərdiyinə dair sübut yoxdur.
Epşteyn hələ 2008-ci ildə prostitusiyanın təşkili ilə bağlı günahını etiraf etmişdi. Bununla belə, yeni açıqlanan qeydlərdə onun həmin tarixdən sonra da yüksək vəzifəli və nüfuzlu şəxslərlə görüşlər planlaşdırdığı görünür.
6 dekabr 2014-cü il tarixli gündəlikdə belə bir qeyd var: “Xatırlatma: İlon Mask – 6 dekabrda adaya (hələ qüvvədədir?)”.
12 may 2000-ci il tarixli uçuş siyahısında isə şahzadə Endryunun Epşteyn və onun tərəfdaşı Gislen Maksvellə birlikdə Nyu-Yorkdan Palm-Biçə uçduğu göstərilir. Daha sonra məhkəmə materiallarında şahzadənin digər uçuşlarda da Epşteynlə birlikdə olduğu təsdiqlənib.
Epşteynin ən yaxın tərəfdaşlarından biri hesab edilən Gislen Maksvel 2022-ci ildə Epşteyn üçün yetkinlik yaşına çatmayan qızların cəlb edilməsində və istismara hazırlanmasında günahkar bilinib. O, 20 il müddətinə həbs cəzasına məhkum olunub. Maksvel isə günahsız olduğunu bildirib və ABŞ Ali Məhkəməsinə apellyasiya şikayəti verib.
Rasim
“AzPolitika.info”
Daha ətraflı məlumat və yeniliklər üçün ain.az saytını izləyin.
