Sportal.az portalından verilən məlumata əsasən, ain.az bildirir.
Son vaxtlarda gündəmdə olan futbolçulardan biri də Kamilo Durandır. "Qarabağ"ın yeni transferi Çempionlar Liqasının 1-ci turunun "Benfika" ilə görüşündə diqqətçəkən performans ortaya qoya bildi. O, artıq Azərbaycan Premyer Liqasında da iki üç keçirməyə macal tapıb. Ümumiyyətlə, onunla yanaşı, daha bir kolumbiyalı var ki, o da Premyer Liqamızda debüt edib. Söhbət Edvin Banqeradan gedir. Banqera Durandan fərqli ÇL-də olmasa belə, Misli Premyer Liqasında qol hesabını açmağı bacarıb. "İmişli"nin yeni transferinin gəlişi ilə çempionatımızda oynamış kolumbiyalıların sayı 10-a çatdı. Sportal.az Azərbaycan çempionatında oynamış, yaddaqalan və hazırda da çıxış edən kolumbiyalıları təqdim edir:
Xose Diaz
İlk kolumbiyalıları ölkəmizə vaxtı ilə "Xəzər Lənkəran" dəvət edib. Belə ki, Rodriqo Rosa Sales o qədər tanınmış olmasa da, Xorxe Diaz Moreno ən azından ölkəsində yaxşı klublarda oynamış biridir. "Deportivo Kali", "LDU Kito", "Onse Kaldas", "Millonarios" kimi komandaların formasını geyinmiş Diaz 2006-cı ildə "Xəzər Lənkəran"a keçmişdi. O, 14 matçda 8 qol vurmağı da bacarmışdı. Lakin həmin il Azərbaycanı tərk edərək, "Atletiko Junior"la anlaşmışdı.
Mike Kampaz
Əslində, Kampaza qədər də ölkəmizdə Kolumbiyadan iki futbolçu: Con Kordoba və Cefferson Anqulo çıxış etmişdi. Lakin onlar yaddaqalan olmamışdılar. Lakin Kampaz "Neftçi" azarkeşləri tərəfindən indi də xatırlanır. Lakin təbii ki, böyük ehtimalla neqativ sarıdan. Bakı klubunun tarixində ən uğursuz transferlərindən olmuş Mayk, həmçinin Premyer Liqamızda oynamış ən bacarıqsız legionerlərdən hesab edilir. "Ağ-qaralar" onunla güc-bəla ilə yollarını ayırmağı bacarmışdı.
Brayan Moreno
Ümumiyyətlə, “Neftçi”nin kolumbiyalı futbolçulardan xeyir gördüyünü demək mümkün deyil. Bu komandanın tarixində iki kolumbiyalıdan biri olan Moreno da, “ağ-qaralar”ın formasını geyindiyi vaxtda daha çox zədələrlə mübarizə aparması ilə yadda qalmışdı. 26 yaşlı forvard “Neftçi”ni tərk etdikdən sonra hələ də, klubsuzdur.
Kevin Medina
Azərbaycan Premyer Liqası tarixinin hələ ki ən yaxşı kolumbiyalısının Kevin Medinanın olduğunu desək, yanılmarıq. 2020-ci ildə “Şaviş”dən “Qarabağ”a keçmiş 32 yaşlı müdafiəçi indi də komandasının aparıcı üzvlərindən hesab edilir. Maraqlıdır ki, Kevin 1993-cü ildə Kolumbiyanın paytaxtı Boqotada dünyaya gəlsə də, həmvətənlərindən fərqli olaraq, peşəkar karyerası ərzində vətənində oynamayıb. Onun karyerasının böyük hissəsi Portuqaliya klubları və “Qarabağ”la bağlıdır.
Hayderson Hurtado
Premyer Liqamızda legioner həyatı yaşayan daha bir kolumbiyalı isə bu il “Turan Tovuz”la müqavilə imzalamış Hurtadodur. Qərb təmsilçisinin əsas oyunçusu olan müdafiəçi “Parana”, “Azuriz”(hər ikisi Braziliya), “Sered”(Slovakiya), “Yablonets”(Çexiya) klublarında çıxış edib. Amma adını qeyd etdiyimiz futbolçulardan heç birinə ölkəsinin əsas millisində oynamaq qismət olmayıb.
Edvin Banqera
"İmişli"nin yeni transferi Kevin Medina kimi, Kolumbiyada dünyaya gəlsə də, indiyə qədər ölkəsinin heç bir klubunda oynamayıb. O, yalnız Portuqaliya komandalarında çıxış edib. Sol cinah müdafiəçisi “İmişli” ilə 2 illik müqavilə imzalayıb və Misli Premyer Liqasının 5-ci turunun “Karvan-Yevlax”la(0:3) görüşündə komandasının heyətində qol hesabını açıb.
Kamilo Duran
23 yaşlı futbolçu bu ay “Qarabağ”lı futbolçular arasında gündəmi ən çox zəbt etmiş biri olmağı bacardı. Azərbaycana gələnə qədər əvvəlki klublarında vinger kimi oynamış Duran, “Qarabağ”ın heyətində Çempionlar Liqasının 1-ci turunun “Benfika” ilə görüşündə nümayiş etdirdiyi performansla nəinki Azərbaycanda, hətta Avropada da diqqətləri üzərinə çəkdi. Peşəkar karyerasına Portuqaliyanın “Lusitania” klubunda başlamış kolumbiyalı “Eştrela Amadora”, “Portimonenşe”də də çıxış etdikdən sonra “Qarabağ”la anlaşmışdı. Ağdam klubunun heyətində göstərəcəyi performans onu Kolumbiya millisinə qədər apara bilər. Hər halda, bir ara Kevin Medinanın məhz “Qarabağ”dakı çıxışı, vaxtı ilə Kolumbiya millisinə rəhbərlik etmiş Karluş Keyruşun diqqətindən yayınmamışdı. Lakin sonda onun millidə oynamaq istəyi reallaşmamışdı. Ancaq Duranın “Benfika” ilə görüşdəki performansına davam edəcəyi təqdirdə, ilk dəfə A milliyə dəvət olunmaq ehtimalının uzaqda olmadığını düşünmək olar. O, bunu reallaşdırarsa, Azərbaycanda oynayaraq, Kolumbiya millisinə cəlb edilmiş ilk futbolçu ünvanına da sahib çıxacaq.
Mirbağırağa
saytlarin hazirlanmasi
Ən son yeniliklər və məlumatlar üçün ain.az saytını izləyin, biz hadisənin gedişatını izləyirik və ən aktual məlumatları təqdim edirik.
