BAKI, TurkicWorld
İranın məhkəmə hakimiyyətinə bağlı “Mizan” agentliyinin məlumatına görə, ölkə hakimiyyət orqanları İsrail kəşfiyyat xidməti Mossadla əməkdaşlıqda ittiham olunan Bəhmən Çubi Əsl adlı şəxsi edam edib.
Məlumata əsasən, o, “İsrailin İrandakı ən mühüm casuslarından biri” hesab olunurdu. İttihamlara görə, Mossad onu əsasən dövlət qurumlarının məlumat bazasına çıxış əldə etmək, İranın məlumat mərkəzlərinə sızmaq və elektron avadanlıqların idxal yollarını öyrənmək məqsədilə cəlb edib.
Ali Məhkəmə Çubinin apellyasiya şikayətini rədd edib və “yer üzündə fəsad törətmək” ittihamı ilə verilmiş ölüm hökmünü qüvvədə saxlayıb.
Xatırladaq ki, İran və İsrail onilliklərdir kölgə müharibəsi aparır. İyunda İsrailin İrana qarşı həyata keçirdiyi hücumlarla qarşıdurma birbaşa müharibəyə çevrilmişdi. Həmin əməliyyatlarda Mossad-ın xüsusi təyinatlı qüvvələrinin də ölkə daxilində fəaliyyət göstərdiyi bildirilmişdi.
Bu il İsrail üçün casusluqda ittiham olunan iranlıların edamı əhəmiyyətli dərəcədə artıb. Son aylarda ən azı 10 belə hökm icra olunub.
