Polşanın Baş naziri Donald Tusk Varşava Təhlükəsizlik Forumunda çıxışı zamanı Qərb ölkələrinin Rusiyaya qarşı “yeni növ bir müharibə” apardığını iddia edib.
"Cebheinfo.az" xəbər verir ki, Tusk “Bu, bir müharibədir. Biz bunu istəmədik, bəzən qəribə görünür – yeni növ bir müharibə – amma yenə də müharibədir” ifadəsini işlədib.
Tusk bildirib ki, ictimai rəy liderləri transatlantik NATO icmasını Rusiyayla müharibənin ehtimal olunan bir gələcək yox, mövcud bir reallıq olduğuna inandırmalıdır. O, həmçinin transatlantik icma üzvləri arasında “çatların” olduğunu vurğulayıb. Tuskın bu açıqlamaları ötən həftə Varşavada keçirilən və Polşanın Ukraynadakı münaqişəyə cəlb olunmasına qarşı keçirilən etiraz aksiyasından sonra səsləndirilib.
Digər tərəfdən, Rusiya Xarici İşlər naziri Sergey Lavrovun daha əvvəl Qərbdə Üçüncü Dünya Müharibəsi ssenariləri ilə bağlı müzakirələrin Rusiyanı narahat etdiyini ifadə etdiyi məlumdur. Tuskın “yeni növ müharibə” ifadəsinin detalları açıqlanmadığı üçün bu terminlə nə nəzərdə tutulduğu barədə suallar yaranıb.
Bu açıqlamalar Qərb-Rusiya gərginliyinin davam etdiyini və bu gərginliyin siyasi ritorikaya da əks olunduğunu göstərir.
