BAKI, 30 sentyabr. TELEQRAF
Müdafiə naziri Pit Heqset ABŞ hərbi personalı və komandanlığı üçün daha sərt fiziki hazırlıq tələblərini açıqlayıb.
Teleqraf xəbər verir ki, o, bu barədə Virciniya ştatının Kuantiko şəhərindəki ABŞ Dəniz Piyadaları bazasında yüzlərlə amerikalı general və admiralla görüşdə bildirib.
“Bu gündən başlayaraq mən əmr verirəm ki, rütbəsindən asılı olmayaraq Silahlı Qüvvələrin hər bir üzvü ildə iki dəfə fiziki hazırlıq testindən, həmçinin çəki və boy ölçülərindən keçməli olacaq”, - nazir deyib.
Heqset artıq çəkinin hərbçilər üçün qəbuledilməz olduğunu vurğulayıb: “Pentaqon dəhlizlərində, ölkənin və dünyanın hər yerindəki komanda mərkəzlərində kök generallar və admirallar görmək qəbuledilməzdir. Bu, pis görünür”.
Pentaqon rəhbəri əlavə edib ki, onun əmri ilə hərbi görünüş tələbləri də sərtləşdiriləcək:
“Artıq saqqallara, uzun saçlara, özümüzü göstərən xarici elementlərə yox! Saçlarımızı kəsəcəyik, saqqallarımızı qırxacağıq və standartlara əməl edəcəyik”.
