Ağ Evdə gedən “səssiz rəqabət” 2028-ci il seçkilərinin mümkün namizədlərini də göstərir…
Poliqon xəbər verir ki, Bloomberg Agentliyi Tramp administrasiyası daxilində ABŞ-nin yeni xarici siyasət doktrinasının formalaşmasında əsas fiqurların, vitse-prezident Cey Di Vens və dövlət katibi Marko Rubionun rolunu təhlil edib. Nəşrin məlumatına görə, Trampın yaxın komandası bu iki siyasi liderin müxtəlif üslublarının və qarşılıqlı münasibətlərinin gələcək kurs haqqında mühüm ipucları verdiyini düşünür.
Nəşr yazır ki, həm Vens, həm də Rubio prezident Trampa yeni xarici siyasət strategiyasının hazırlanmasında fəal şəkildə kömək edirlər. Rəsmi şəxslər iddia etsələr də ki, aralarında rəqabət yoxdur, Bloomberg yazır ki, Tramp şəxsən bu münasibətlərdə “Apprentice” tərzində, simvolik səviyyədə olsa da, yarış elementi yaradıb. Mənbələrə görə, Tramp bir müddətdir ki, öz yaxın dairəsində növbəti rəhbərliyin kimə keçə biləcəyi barədə zarafatlar edir və gah Vensin, gah Rubionun adını çəkərək “estafeti hansı daha yaxşı aparar” sualını gündəmdə saxlayır.
Trampa yaxın şəxslər bildiriblər ki, bu zarafatların bir hissəsi prezidentin “xrom ördək” statusunu diqqətdən yayındırmağa xidmət edir. Yəni Trampın siyasi dövrünün son mərhələsinə yaxınlaşması fonunda administrasiyanın gələcəyinə dair müzakirələrin aktiv qalması məqsəd güdür.
Məqalədə deyilir ki, hər iki siyasətçinin Ağ Evdə nüfuzu artmaqdadır. Rubio diplomatik təcrübəsi və Konqresdəki əlaqələri ilə fərqlənir, Vens isə Trampın ideoloji xəttinə daha yaxın fiqur kimi qəbul edilir və xarici siyasətdə “Amerika əvvəlcə” prinsipinin daha sərt interpretasiyasını təklif edir. Bu iki fərqli yanaşma administrasiyanın gələcək kursu üçün mühüm əlamətlər sayılır.
Bloomberg-in analitiklərinə görə, Tramp 2028-ci il prezident seçkilərində Respublikaçılar Partiyasının əsas namizədi rolunda məhz Vens və Rubionu görür. Onların hazırkı rolu, Ağ Ev daxilində artan çəkiləri və Trampın diqqətli şəkildə formalaşdırdığı “dostcasına rəqabət” modeli bunu təsdiqləyir.
Nəşr yazır ki, bu iki fiqurun siyasətdə yüksəlişi ABŞ-ın xarici əlaqələrində də paralel iz buraxır. Son aylarda Rusiya, Çin, Yaxın Şərq və Avropa ilə bağlı strategiyaların arxa planında məhz onların təklif və təsirləri sezilir.
Analitiklər hesab edir ki, Trampın öz hakimiyyət dövrünü yekunlaşdırarkən siyasi “varislik oyunu”nu gücləndirməsi onun administrasiyada nizamlı keçid istəyi ilə yanaşı, Respublikaçı elektorata enerji vermək məqsədi də daşıyır.
Poliqon.info
