İtaliya məhkəməsi Baltik dənizində "Şimal axını" partlayışını əlaqələndirməkdə şübhəli bilinən Ukrayna vətəndaşı Sergey Kuznetsovun Almaniyaya ekstradisiyası barədə qərar qəbul edib.
Musavat.com xarici mediaya istinadla xəbər verir ki, ekstradisiya qərarı İtaliya Ali Apelyasiya Məhkəməsi tərəfindən verilib. Əvvəllər Ukrayna ordusunda xidmət etmiş Kuznetsov tezliklə polis müşayiəti altında Almaniyaya köçürüləcək. Orada onun konstitusiya quruluşunu pozmaqda ittiham olunması planlaşdırılır.
Alman prokurorlarının sözlərinə görə, Kuznetsov 2022-ci ildə Baltik dənizində qaz boru kəmərlərinin partladılmasında iştirak edən bir qrupa rəhbərlik edib. Müstəntiqlər onun yalnız iştirakçıların hərəkətlərini əlaqələndirmədiyini, həm də əməliyyatın hazırlanmasında şəxsən iştirak etdiyini düşünürlər.
Keçmiş hərbçinin vəkili Nikola Kanestrini bildirib ki, müvəkkili özünü haqsız yerə ittiham olunmuş hiss edir və Ukrayna hakimiyyətindən heç bir dəstək almayıb. Onun sözlərinə görə, Kiyev nə Kuznetsovun partlayışlar zamanı hərbi xidmətdə olduğunu, nə də 2022-ci ilin sentyabr ayında yerini təsdiqləməyib.
Kanestrini bildirib ki, əgər o, hücumu həyata keçiribsə, deməli, əmr aldığı üçün bunu edib, çünki o, Ukrayna ordusunun kapitan rütbəli hərbçisi olub.
Vəkil həmçinin əlavə edib: "Ukrayna hökuməti onun 2022-ci ilin sentyabr ayının hər günü harada olduğunu dəqiq bilir. Əgər o, günahsızdırsa, niyə bunu demirlər? Əgər o bunu edibsə, niyə etiraf etmirlər? Bu, onun sualıdır."
Ukrayna rəsmiləri hələlik vəziyyətlə bağlı şərh verməyiblər.
Musavat.com
